El borrador de repartu de cuotes de xarda da a la flota asturiana un 71 por cientu más que nel añu 2019

La flota asturiana dispondrá de más de 2.000 tonelaes de xarda de cuota, una de les mayores cantidaes dende’l 2014, según afita’l borrador treslladáu a les comunidaes autónomes pola Secretaría Xeneral de Pesca del Ministeriu d’Agricultura, Pesca y Alimentación. L’aumentu sería del 71 por cientu en comparanza col añu pasáu.

En total la cantidá que-y correspondería a Asturies ye de 2.083.339 quilos. El documentu, al que se-y pueden presentar alegaciones hasta'l martes, recueye los repartos de los intercambios de posibilidaes de pesca ente estaos –nomaos swaps– tomando en consideración criterios de calter socioeconómicu y de dependencia de la flota, reivindicación asturiana, según apunten dende’l Gobiernu.

L’Executivu estatal algamó en dichos intercambios 1.700.000 quilos, de los que’l 60 por cientu repartiráse teniendo en cuenta criterios como’l númberu de buques, la eslora o la capacidá de propulsión, lo qu’atiende a les demandes del sector pesqueru asturianu, en llugar de los anteriores criterios históricos, informen. La nuesa flota tenía asignaos nun primer momentu pa la campaña d’esti añu 1.796.190 kilos de xarda, a los que s’añadirán 287.149 más cuando s’oficialicen los intercambios de posibilidaes de pesca ente estaos.

Esta cantidad supondráu un incrementu importante, yá que colos criterios de repartu d’años anteriores namái s’algamaría 92.000 quilos de los 1.700.000 xeneraos por estos intercambios. En concreto, l’añu pasáu los barcos asturianos dispusieron en suma de 1.217.785 quilos.