El Boiro, rival del Caudal na eliminatoria d'ascensu a Segunda División B

Los d'Iván Ania han de superar al campeón gallegu si quieren tornar a la categoría de bronce del fútbol estatal pela vía rápida.

El Clube Deportivo Boiro, equipu humilde en crecimientu nos años últimos d'una población de 19.000 habitantes na provincia d'A Coruña, va ser el rival del potente Caudal na so busca de recuperar la categoría perdida hai dos años y que nel pasáu nun foi quien a algamar. Los de Mieres vienen d'algamar el so récor de puntos en Tercera División (95) y ye un equipu fechu p'ascender, anque los gallegos nun van poner les coses fáciles. El primer partíu va xugase en Galicia a les 18 hores, choque que va televisase per TPA.

El segundu clasificáu del grupu asturianu, el UP Langreo va tener como principal hándicap el viaxe llargu hacia Alcalá de Guadaíra pa enfrentase al equipu llocal y el previsible calor qu'habrá'l domingu a les 11.30 hores na población sevillana. Fechu pa xubir y con apoyu económicu detrás, el CD Alcalá nun dio la talla y finó la competición tres el Córdoba B, l'Atlético Sanluqueño y el San Fernando.

L'Avilés, pela so parte, va xugar contra otru terceru, el Lagun Onak vascu, col factor campu a favor. Los avilesinos van desplazase a Azpeita esta fin de selmana pa vese les cares col equipu llocal el domingu a les 18 hores nuna eliminatoria que se preve igualada.

El que llevó la peor parte del sortéu foi'l Marino, que va tener qu'enfrentase al segundu catalan, el Gavá, namái superáu nel so grupu pol Prat. Sicasí, los de Blas García vienen de protagonizar una gran remontada na tabla pa metese nes eliminatories pol ascensu nes xornaes últimes y cuenta con una plantiya con xugadores veterenos a los que nun-yos debería pesar la presión. El choque d'ida va xugase en Miramar a les 18 hores, únicu partíu que se va disputar d'esta fase n'Asturies esta fin de selmana.