El BNG propón nel Congresu retirar la pensión a González y Aznar

El Bloque Nacionalista Galego (BNG) rexistró nel Congresu una iniciativa pa retirar la pensión vitalicia a los ex presidentes del Gobiernu mientres cobren d'empreses privaes y pa endurecer el so réxime d'incompatibilidaes.

La proposición non de llei, que va haber de votase nel Plenu del Congresu, tien el so orixe nos fichaxes de los ex presidentes Felipe González y José María Aznar per parte de Gas Natural-Fenosa y Endesa, respectivamente, que nun-yos torga siguir percibiendo l'asignación vitalicia reservada pa los que presidieron el Gobiernu d'España.
 
El voceru del BNG nel Congresu, Francisco Jorquera, reclama un cambiu del estatus reglamentariu de los expresidentes del Gobiernu, "esixendo la renuncia a les prerrogativas conseñaes nesti momentu -nun siendo les vinculaes a garantizar la so seguridá-, en casu de qu'exerzan actividaes remuneraes por cuenta d'empreses privaes".
  
Según los Presupuestos Xenerales del Estáu del presente añu, caún d'estos dos ex presidentes del Gobiernu va recibir nel 2011 una pensión d'unos 80.000 euros, más de lo que va cobrar el xefe del Executivu n'exerciciu, José Luis Rodríguez Zapatero. 
  
Pero, amás, el BNG quier revisar la vixente normativa sobre conflictu d'intereses de los miembros del Gobiernu y altos cargos de l'Alministración pública, y endurecer el réxime d'incompatibilidaes.

Más años d'incompatibilidá  
Nesti sen, demanda al Gobiernu una aplicación más rigorosa de la incompatibilidá de desempeñar actividaes privaes remuneraes con posterioridá al periodu d'exerciciu del cargu públicu, "ampliando los periodos de llenda vixentes dende que se produxo'l cese".
  
Tamién pide Jorquera que s'amplíen les situaciones llegales nes qu'existe incompatibilidá o conflictu d'intereses a "aquellos supuestos nos que se realicen asesoríes o consultoríes especiales a los órganos de dirección y alministración, o se participe como miembru o asesor especial en dichos órganos, d'empreses privaes que la so actividá ta rellacionada col ámbitu de competencies exercíu dende l'ámbitu públicu".
  
Jorquera alude al réxime d'incompatibilidaes de los miembros del Gobiernu y altos cargos de l'Alministración, señalando que "foi ampliando la so radio d'acción, tomando tamién situaciones nes que la incompatibilidá d'intereses nun ye simultánea, sinón anterior o posterior al exerciciu del cargu".
  
Según almitió, la normativa yá esperimentó una evolución "dende un enfoque más rectrictivu" anque "tovía se permite que se produzan situaciones nes que la ética ye discutible". Ello ye que los parlamentarios del BNG nunca apoyen los informes de la Comisión del estatutu del Diputáu qu'autoricen la compatibilidá de funciones a les sos señoríes.