El Bloque por Asturies va entamar negociación con IX con vistes a les elecciones del 2007

El I Conceyu nacional del Bloque por Asturies decidió entamar un diálogu negociador con Izquierda Xunida con vistes a repetir alianza electoral pal añu 2007 y apautóse n'entamar una ronda de contactos con otres fuerces del asturianismu d'izquierdes.

El Bloque por Asturies (BA) celebró esti sábadu'l so I Conceyu Nacional, nel que renovó la so estructura organizativa y aprobó delles resoluciones que van mandar el so discursu políticu d'equí al próximu añu, en que tienen de celebrase elecciones al gobiernu y conceyos d'Asturies. Una media d'unes 125 persones asistieron a les distintes meses y ponencies d'esti Conceyu, nel qu'ún de los temes que más espectación teníen a priori yera'l del asitiamientu políticu del BA con vistes a les próximes elecciones autonómiques del 2007.

Pa entamar a definir la posición del BA nesti procesu electoral, nel Conceyu dióse-y el preste a la dirección del Bloque pa qu'abra negociaciones con Izquierda Xunida con vistes a definir un posible futuru electoral conxuntu. L'entamu d'estes negociaciones nun supón qu'haya nada zarrao al respective y como aclaria Rafael Palacios "El tiempu dirá si al final vamos volver a presentanos xuntos". Nesti sentíu, y pa evaluar en que condiciones ha ser esti diálogu con IX, el Bloque fizo una evaluación del grau de cumplimientu de los alcuerdos del actual pautu de gobiernu que s'asoleyara nun futuru documentu de síntesis.

Pa definir esti futuru electoral y estudiar toles posibilidaes de negociación con vistes a estes elecciones, el Conceyu Nacional autorizó tamién a la Dirección del partíu a abrir el diálogu con otres organizaciones de la izquierda asturianista que tean dimpuestes a falar col oxetivu de facer candidatures conxuntes nel 2007. Nesti sentíu, y nún ámbitu más ampliu'l Bloque plantegóse l'oxetivu de meyorar la comunicación con toles formaciones del ámbitu asturianista, tanto polítiques como culturales, asumiéndose dafechu como discursu na cuestión llingüística'l que ta llevando alantre'l Conceyu Abiertu Pola Oficialidá.

D'otra manera, la tercer fuerza política del patu de gobiernu asturianu remocicó dafechu tola so organización, que cambia la so estructura pa pasar a mandase por una doble estructura. En primer llugar va tar como órganu executivu la Direccion Nacional, qu'igüen Roberto Colunga como Secretariu Xeneral, Inmaculada Fuentes como ayalguera, David Suárez en calidá d'interlocutor colos movimientos sociales, Ana Suarez como Responsable d'organización y Rafael Palacios como Portavoz Nacional. Xunta esta Dirección Nacional, el Bloque completa la so estructura amestando una Xunta Nacional na que van tar los miembros de la DN más ún representante de les mocedaes del Bloque, un responsable de prensa y ún representante por cada comarca onde'l BA tenga representación. Como novedá, esta Xunta nacional va tar tamién abierta a militantes y simpatizantes del BA, y ello ye qu'una de les cuestiones que s'aprobaron foi que d'agora en p'alantre tolos órganos del BA tean abiertos a la sociedá asturiana cola intención de superar el conceptu clásicu de militancia dientro de la idea del BA de ser, más qu'un partíu políticu al usu, un movimientu referencial dientro del asturianismu d'izquierda. L'aumentu de la militancia y l'estudiu del crecimientu que ta teniendo la organización tamién formaron parte del debate.

Ente les demás resoluciones que s'aprobaron esti sábadu ta'l convocar una estructura d'alcuentru na que participen IX, Blo que y otres organizaciones polítiques, sindicales y culturales col oxetivu de consensuar una propuesta d'Estatutu d'Autonomía como base pa les discusiones nel procesu de reforma de la llei orgánica de la Comunidá Autónoma Asturiana, ello al empar que dende'l Bloque va facese una campaña de concienciación social pa tresmitir al pueblu asturianu la importancia que tien esti procesu de reforma.

L'apoyu a la emigración asturiana más mozo o una resolución de sofitu espresu a los trabayadores de Menasa foron otros de los puntos que se trataron nesti Conceyu Nacional nel que s'acreditaron mas de 150 persones.