El Bloque por Asturies pon agrupación en Grau

Esti sábadu presentóse en Grau l'agrupación nesti conceyu del Bloque por Asturies. Asistieron al actu Rafael Palacios, Portavoz Nacional de Bloque por Asturies y Director de l'Axencia Asturiana de Cooperación al Desarrollu, Roberto Colunga Fernández, Secretariu Xeneral de Bloque por Asturies y Pablo Armenta, en representación de Bloque por Asturies de Grau.

Armenta asitió políticamente al BPA de Grau como una formación que tien de representar y buscar el so votu na clase trabayadora y la mocedá. Y en referencia a ello fizo alusión al conflictu colos trabayadores de la piscina climatizada, sobre los que dixo que "ya nos manifestamos en solidaridá colos trabayadores y usuarios de la piscina y siguiremos lluchando colos trabayadores y ciudadanos pa que se ponga fin a esta y otres inxusticies". P'Armenta, cola presentación del Bloque en Grau entama "una nueva etapa na política municipal, una etapa na que Bloque por Asturies va configurase como una fuercia política que va ser pa muncha xente un referente políticu y social".

Bloque por Asturies definióse nel actu más que como una fuercia política como un puntu d´alcuentru de xente d´izquierdes que llucha por un proyeutu d'Asturies como país. El fundador del BPA, Rafael Palacios, sorrayó que la organización tien munchu enfotu nel procesu que s'abre agora pa reformar l'Estatutu d´Autonomía d´Asturies, apuntando la oficialidá de la llingua asturiana y la equiparación d´Asturies coles llamaes nacionalidaes históriques como los puntos claves a defender dende´l Bloque. Per otru llau, Palacios tamién insistió na necesidá de qu'Asturies tenga voz propia n´Europa y nesi sentíu, dio anuncia de que la formación va participar activamente na campaña de les elecciones europees nes que va nes llistes xunta Izquierda Xunida.