El Bloque por Asturies debate'l so futuru más inmediatu

El Bloque por Asturies, organización política que se presentó conxuntamente con Izquierda Xunida nes pasaes elecciones autonómiques del 2003 y que dende entós exerce como tercer organización del Gobiernu tripartitu asturianu, va celebrar mañana sábadu 1 d'abril, el so I Conceyu Nacional. Baxo'l lema "Faciendo país dende la izquierda" el Bloque va axuntar a más d'un cientu de persones, militantes y asistentes convidaos, que van analizar y debatir, ente otros asuntos, el cumplimientu del pautu de Gobiernu suscritu cola FSA-PSOE y IX y l'estáu del alcuerdu ente'l BA con esta formación o'l marcu de negociación y les posibilidaes que s'abren cola reforma del estatutu d'autonomía p'Asturies.

La reunión que va definir el futuru políticu a mediu plazu de la organización qu'encabeza Rafael Palacios va entamar a les 10 de la mañana nel Hotel Asturias de Xixón, y ente los puntos que van tratase, amás de la ponencia marcu de situación política y la lóxica renovación de la directiva de la organización que suel facese nun congresu d'estes característiques, ta la propuesta de creación d'unes Mocedaes del Bloque por Asturies.