El Bloque por Asturies afirma que nun va firmar reforma del estatutu ensin oficialidá

Rafael Palacios y Roberto Colunga, dirixentes de Bloque por Asturies, dieron esta mañana una rueda de prensa n'Uviéu p'afitar les posiciones de la so organización na reforma del Estatutu d'Autonomía. Afondando nes declaraciones que diere'l pasáu miércoles a Asturies.com, Rafael Palacios afirmó que la so organización nun va compartir nengún alcuerdu de gobiernu con fuerces polítiques que nun quieran reconocer la oficialidá nel estatutu d'autonomía y apeló "a la responsabilidá de les fuerces polítiques asturianes pa nun convertir el reconocimientu d'un derechu humanu nun conflictu de consecuencies imprevisibles".

El secretariu del Bloque por Asturies Roberto Colunga apautó'l marcu xeneral en que s'inxerta l'actual reforma del estatutu d'autonomía y afirmó que "Dende Asturies y dende la izquierda, ye inasumible'l caltenimientu d'una situación de torga permanente del desarrollu de les nuestres instituciones polítiques d'autogobiernu, que se nos llenden competencies básiques o se nos niegue la nuestra identidá". Colunga declaró que pal Bloque ye preciso retrucar al escosamientu del modelu actual d'autonomía d'Asturies y a la reforma estatutaria del 1998, que-y abulta que "nació muerta". Contra ello, el secretariu del Bloque diz que la so organización ve con enfotu les posibilidaes que s'abren cola reforma estatutaria, un procesu que camienta qu'ha dar con "una dimensión territorial, económica y ambiental, col oxetivu de construyir modelos de desarrollu sostenibles qu'equilibren Asturies" y qu'ha "garantizar la participación y el protagonismu social, rexenerando'l sistema democráticu, reconociendo la realidá nacional, llingüística y cultural d'Asturies y el derechu a escoyer llibremente'l nuestru futuru colectivu como Pueblu".

Lloñe del llinguaxe de les imposiciones, Colunga declaró que l'Estatutu asturianu ha salir "del diálogu ente toles fuerces ensin escluyir nenguna parte de la sociedá". Un diálogu que Rafael Palacios, dirixente tamién de BA, cree que forma parte del discursu históricu del asturianismu que dixo que "foi quien a separtase del camín del conflictu pa buscar un camín de futuru consensuáu pa la nuestra llingua, sentándose a la mesa de negociación con tolos interlocutores". Con too y con ello, Palacios alvirtió de que la reivindicación llingüística n'Asturies pue derivar "nun conflictu de consecuencies imprevisibles" conflictu que, de producise, nun se-y podría echar la culpa esclusivamente a les fuerces asturianistes, en cuantes que según Rafael Palacios son "les úniques que s'esfuercen por llegar a alcuerdos".

El tamién Director de Cooperación del Gobiernu asturianu afirmó que contra la voluntá de diálogu namás hai "l'insultu permanentemente, la descalificación y les posiciones belixerantes pa col nuestru idioma y identidá" polo que llamó a "tar a l'altura de la situación" a los elementos más contrarios a les reivindicaciones asturianistes, con atención especial al secretariu de la FSA - PSOE Javier Fernández, al que Palacios acusó de facer "declaraciones cíniques y ofensives" al afirmar que nun diba aceptar la oficialidá por ser esta una "cláusula d'imposición". Palacios negó-y la mayor al secretariu de la FSA y pidió-y qu'atendiere a les "auténtiques cláusules d'imposición que carecemos los asturianos" en referencia "al portalgu del Güerna, l'exiliu económicu de la mocedá o la reconversión económica permanente".

Afitándose otra vuelta na idea de que nin FSA nin PP tienen interés real en facer la reforma del Estatutu nesta llexislatura , Rafel Palacios declaró que, en cualquier casu, el Bloque nun diba participar "en nengún gobiernu, coalición electoral o alcuerdu políticu permanente o coyuntural con nenguna fuerza política que votare a favor o sofite una Reforma Estatutaria que nun reconoza los derechos políticos, económicos, sociales, culturales y llingüísticos que-y correspuenden a Asturies, ente ellos la Oficialidá de la Llingua Asturiana y del Gallego-Asturiano nel so territoriu".