El Bloque niega que la crisis de L.lena afecte al pautu de gobiernu

La crisis interna qu'atravesaba dende diba tiempu la representación de la coalición IX-BA en conceyu de L.lena llegó esta selmana a un puntu de francedura ensin torna. Ayeri, los representantes del Bloque dieron una rueda de prensa na qu'esplicaron que la directiva d'Izquierda Xunida (IX) de L.lena queda pal Bloque por Asturies (BA) fuera del pautu de gobiernu

Los representantes del Bloque por Asturies en L.lena, conceyu onde la coalición IX-BA algamó 5 conceyales nes elecciones del 2003, llamentaron el deterioru de les rellaciones ente IX y BA dende la llegada a la directiva d'IX de L.lena de David Lana, al que ficieron responsable d'echar a apique la bona rellación de collaboración qu'hasta esi momentu se daba ente los dos grupos políticos.

Cola llegada de David Lana, antiguu militante de les Nueves Xeneraciones del PP, al frente de l'agrupación local d'IX, la rellación d'IX y BA en L.lena entamó a rinchar, sobremanera dende'l momentu en qu'una parte de los conceyales d'IX, encabezada pol candidatu a l'alcaldía nel 2003 Ramón Argüelles, decidieron presentar la dimisión. Irónicamente, estes dimisiones tracamundiaron l'equilibriu ente IX y BA nel gobiernu del conceyu, pasando'l Bloque al correr puestos na llista electoral a tener 3 conceyales por 2 d'Izquierda Xunida.

La negociación estes selmanes de los presupuestos l.lenizos pal 2006 llevó esti enfrentamientu a un puntu yá ensin torna. Mientres IX defendía la oposición a los presupuestos que punxo enriba de la mesa l'alcalde Hugo Morán (PSOE) el Bloque por Asturies foi partidariu d'una postura negociadora, llegando nel momentu de la votación de los mesmos a francer la unidá de votu, cola única conceyala d'IX presente votando en contra y los trés del Bloque absteniéndose, dando con ello un resultáu que permitió l'aprebación de les cuentes del conceyu pal añu qu'entra. Ello llevó a que la dirección local d'IX en L.lena declarare esti llunes que daba por rota toa rellación col BA, al qu'acusó incluso d'amagostar en secreto col PSOE la so postura nel tema de los presupuestos a cambéu de delles concesiones.

La versión de los conceyales del BA, encabezaos pol vocal Agripino Pérez, qu'ayeri tuvo acompañáu pol dirixente del BA Rafael Palacios na rueda de prensa que se dio al efectu, ye bien distinta. Negando l'acusación de tener pautu secretu nengún col grupu socialista, los representantes del BA esplicaron que, con nun ser estos los presupuestos qu'ellos quixeren, dábase la circunstancia de que'l conceyu lleva en situación de prórroga presupuestaria dende l'añu 2002, daqué que yá daba como pa ver con otra perspectiva'l debate presupuestariu. Los representantes del BA dicen que participaron nes reuniones públiques de la comisión presupuestaria y que públicamente negociaron nelles la confirmación de dellos puntos del presupuestu como la del poligonu de Vil.lallana y la retirada d'otros como'l del centru de dinamizacion turistica, pal que nun taba confirmao d'au podia salir la financiación, ello amás de llograr xubes presupuestaries n'estayes como la de cultura asturiana, un puntu que-yos valió'l calificativu de "folcloristes" por parte de los sos compañeros de viaxe políticu, según esplicaron los conceyales de BA, que de cualquier manera ven una hipoteca pal futuru del conceyu na delda qu'arrastren les cuentes l.lenices.

Con ello, agora les rellaciones ente IX y BA en L.lena queden rotes oficialmente, y d'agora en p'alantre cada partíu va xestionar independientemente la so representación en conceyu, y en casu de celebrase unes hipotétiques elecciones, lo que tienen claro nel BA ye que nun piensen acudir a elles de la mano de l'actual directiva local d'IX. El teóricu interrogante qu'ello pon nel futuru de la coalición a niveles estramunicipales desaniciólu rapidamente Rafael Palacios, qu'estremó l'ámbitu de conceyu de l'ámbitu asturianu, nel que la salú del pautu IX-BA ye mui bona. La interpretación de Palacios de lo qu'ocurre en L.lena ye que'l grupu de David Lana asitióse fuera d'Izquierda Xunida, a la que pa elli, yá nun representa. Pa los representantes del Bloque, que dicen tener una gran afinidá col gruesu militancia d'IX de L.lena anque non cola so directiva, el problema en L.lena ye polo responsabilidá d'IX, a la que convidaron a tomar midíes nel asuntu.