El Bloque critica la "desgracia económica" y llama a la reactivación

El Bloque por Asturies criticó l’aumentu del paru n’Asturies en 3046 persones el mes de setiembre. Calificaron de “desgracia económica” les polítiques actuales y llamen a la reactivación económica con vistes a los presupuestos asturianos.

“Los datos de setiembre son el nidio reflexu del fracasu ablucante d’una política económica basada nos retayos n’inversión pública y ayudes sociales, la reducción de salarios y pensiones, la subida del IVA y la imposición de la Reforma Llaboral” criticó’l Bloque por Asturies.
 
Pa la formación d’izquierda nacionalista la política económica de Zapatero y Areces ye “incapaz” de sacar de la crisis a la ciudadanía y de crear empléu “estable y de calidá”. Por ello consideren que los Presupuestos d’Asturies 2011 “deben convertise nun elementu cimeru pa la creación d’empléu estable y de calidá, pa la reactivación económica y pal fortalecimientu de la inversión pública”.

Contra la estación de gas de Celoriu
Per otru llau, el Bloque por Asturies esixió la paralización “inmediata” de la estación de gas de Celoriu. Esta instalación fíxose ensin llicencia de la Conseyería de Cultura y Turismu y instalóse enantes de qu’acabare’l períodu d’información pública y alegaciones a les que tienen que tar sometides esti tipu d’obres.

“L’equipu de gobiernu llaniscu taba más interesáu en defender los intereses de la empresa Hidroeléctrica del Cantábrico (HC) que los de los vecinos y vecines de Celoriu, col riesgu real d’escapes y españíos de gas”, criticó’l BA en rellación a que’l Conceyu de Llanes incumpliera’l procedimientu alministrativu de les alegaciones.