El Bloque, contrariu a la opinión de Trinidad Jiménez de mantener el tratáu de pesca con Marruecos

El Bloque por Asturies esixe’l cese inmediatu del tratáu de pesca de la Xunión Europea con Marruecos pa la esplotación de les agües del Sahara Occidental. La ministra Trinidad Jiménez defendió’l martes la continuidá del alcuerdu.
 
El 27 d’esti mes termina’l tratáu de pesca ente la Xunión Europea (XE) y Marruecos, y la intención del Gobiernu estatal ye qu’ésti se prorrogue pa que los pesqueros españoles nun dexen de faenar en territoriu marroquín y saharaui. La continuidá del alcuerdu foi defendida ante la Comisión Mista ante la XE pola ministra d’Asuntos Esteriores, Trinidad Jiménez, qu’apoya que Rabat continúe negociando la pesca del Sahara Occidental. Esta opinión del Gobiernu estatal ye contraria a la del Bloque por Asturies, qu’esixe “el cese inmediatu del alcuerdu actual” y reclama “ún pautu nuevu qu’escluya les agües pertenecientes al Sahara Occidental, anque la XE nun debería firmar pautos con gobiernos non democráticos”.
 
El Bloque por Asturies recuerda la esixencia de la comisaria europea de Pesca, María Damanaki, de probar si los alcuerdos pesqueros con Marruecos beneficien o non a la población del Sahara Occidental, yá que, “la esplotación y el saquéu de los recursos marinos y demás recursos naturales de los territorios coloniales y non autónomos por parte d’intereses económicos estranxeros, en violación de les resoluciones pertinentes de les Naciones Xuníes, constitúin una amenaza a la integridá y la prosperidá d’esos territorios”. N’opinión de la formación nacionalista, “l’alcuerdu pesqueru XE-Marruecos ye políticamente revesosu y viola la llei internacional”. Por ello, reclama a la XE'l cese de la pesca nel Sahara Occidental “hasta que se resuelva’l conflictu”.