El Bloque califica de “sentencia de muerte” l’alcuerdu del Carbón

|

El Bloque por Asturies manifestó’l so rechazu al alcuerdu del Carbón aprobáu’l miércoles pola Comunidá Europea. Pa los asturianistes, esti plan ye “la sentencia de muerte de la minería asturiana”.

En nota de prensa, el BA criticó que’l plan aprobáu pol Comité de Representantes Permanentes conceda ayudes hasta’l 2018 condicionaes al pieslle de les esplotaciones deficitaries.

“L’aprobación d’esti alcuerdu significa’l pieslle de casi toles esplotaciones mineres asturianes”, señaló’l Bloque por Asturies. Amás, añadieron que n’Asturies el zarru de les explotaciones va “producise bastante antes” de 2018, por mor de que’l nuevu Reglamentu contempla reducciones anuales.

D’esti mou, en 2013 les ayudes van reducise nun 25%, el 40% a finales de 2015, el 60% en 2016, el 75% en 2017 y, el 31 d’avientu de 2018, les esplotaciones que recibieron subvenciones estatales deben poner finar cola so actividá.

Xiru de 180º
Pal Bloque por Asturies, esti alcuerdu supón un “xiru de 180º” en rellación a lo recoyíu nel Plan del Carbón de 2016-2012, que venceyaba les ayudes a la actividá y non al pieslle, como se fai con esti nuevu Reglamentu. Amás, supón tamién la desaparición de la creación d’una reserva estratégica de carbón autóctonu.

“Hai que sorrayar la evidencia de la traición más absoluta per parte del Gobiernu Central y el seguidismu del Gobiernu d’Asturies, que calla sumisamente ante lo acordao”, denunciaron dende la formación d’izquierda nacionalista.

El Bloque acabó’l so comunicáu manifestando’l so apoyu a toles movilizaciones contra’l rechazu a les medides alcordaes pola Comunidá Europea y llamando a la población asturiana a participar nes acciones de protesta.
 

Contador Estadistiques