El blogue 'Como augua de torbón' cuenta con detalle la peripecia xudicial de Pérez Alonso 'Valdés'

Xosé Miguel Suárez Fernández pudo ampliar la información del llibru sobre esti conceyal d'Izquierda Republicana en Navia fusiláu nel 36 al conocer al so bisnietu Luis García.

L'autor del llibru en gallego-asturiano ‘Como augua de torbón. Guerra civil y represión franquista nel estremo noroccidental d'Asturias’ (2021, Ediciones Trabe) pa recuperar la memoria de les 800 víctimes documentaes na zona, sigue completando los conteníos de la obra al traviés del blogue, qu'abrió l'añu pasáu. L'últimu correspuende a la historia de Francisco Pérez Alonso 'Valdés', fusiláu en Lugo nel 1936 a los 73 años, del que fala nel llibru de manera resumida na páxina 383, amás de nuna parte dedicada a la política municipal naviega (páxines 63-65).

La posibilidá de conocer al so bisnietu, Luis García Suárez, y d'acceder a una información detallada sobre la so vida llevó a Suárez Fernández a precisar nel blogue más datos sobre esta persona y la peripecia xudicial recoyida na Causa 625/36, a la que se tuvo qu'enfrentar al ser señaláu como "significado izquierdista, distinguiéndose en la persecución de elementos de derecha y causando todo el daño que pudo a estos", una afirmación sobre la que "nun houbo ningúa investigación posterior nel proceso nin testimonios de presuntos perseguidos por Valdés que la corroboraran", y que sería acusáu xunto con otros presos, "nun exemplo máis del que supuxo aquella 'xusticia al rovés dictada polos sublevaos'", del "alzamiento en armas contra las fuerzas del Ejército Nacional […] en calidad de autores materiales, unos con armas en la mano, otros ostentando cargos preeminentes de responsabilidad en el Ayuntamiento, en el Comité de Abastos, en el de Guerra o en otros de los muchos Comités en que dividían su acción revolucionaria".

Na imaxe, Francisco Pérez Alonso 'Valdés' y la so muyer, Dorotea Méndez, nuna semeya anterior al añu 1936.