El Beltaine torna a llevar la cultura del Arcu Atlánticu a Avilés

L’Intercélticu d’Avilés, el Beltaine, principia esti vienres y va allargase hasta’l 17 de xunetu. Van ser 10 díes nos que la villa avilesina va vivir bailles y actuaciones musicales de raigañu celta, amás d’esposiciones y actividaes deportives y infantiles.
 
La Fiesta’l branu presenta otra vuelta un programa mui completu que va principiar a les 18 hores nel Palaciu de Valdecarzana cola presentación y inauguración de la esposición ‘Instrumentos musicales na Asturies Tradicional’. Un poco más tarde, a les 19.30 hores, va colocase la bandera del Beltaine na islla de San Balandrán, actu que se considera l’apertura oficial del Intercélticu avilesín.
 
Pa los díes restantes, la ciudá va vivir una cantidá importante d’actividaes nos que destaca la presencia de munchos grupos de baille, gaites y música celta de fuera del nuesu país. Nel llistáu de participantes apaecen Niamh Ni Charra (Eire), Kekezza (Kernow/Cornualles), Inverglen Scottish Dance (British Columbia, Canadá), Bagad Konk Kerne, Bagad Sonerien Bro Dreger y B. Konk Kernow (Breizh), Lous Gouyats de L’Adou (Landas, Aquitània), Siamsoir Celtic Dancers (Alba) y Carlos Nuñez y Banda Gaitas (Galicia). La representación asturiana nesta edición va tar compuesta por Tejedor, Anabel Santiago, Pleamar, Xaréu d’Ochobre, Banda Gaites Villa d’Avilés, Banda Gaites Noega, Asociación Escontra’l Raigañu, Rubén Alba, Xurde Fernández, Xuntanza y Maura Xeva.
 
Les actuaciones músicales más destacas van celebrase pela nueche nel Parque’l Muelle y van inaugurase mañana con un conciertu de Tejedor, a les 23 hores, grupu llocal que torna a tocar n’Avilés tres presentar el so discu nuevu, ‘Positivu’, el 19 xunu pasáu nel Centru Niemeyer. Una hora enantes, el públicu avilesín va poder presencia los bailles de los escoceses Siamsoir Celtic Dancers. Otres cites que tán marcaes en colloráu polos aficionaos son l’actuación d’Anabel Santiago esti miércole; la de Niamh Ni Charra, el vienres; y la de Carlos Nuñez xunto a la Banda Gaites Villa d’Avilés, el sábadu. Toes estes actuaciones van principiar a les 23 hores.
 
Amás de les intervenciones musicales previstes y dellos pasucais, también va haber güecu nel Beltaine pa delles actividaes deportives y otres destinaes al públicu infantil. No que respeuta a les esposiciones, amás de la que va inaugurase esta tarde, el públicu que s’avere a Avilés va poder visitar otres cuatro: ‘Ciruelo Cabral: arte fantástico’, nel CMAE; ‘Humor gráfico asturiano’, na Casa Cultura; y ‘Asturias Cotidiana, Favila’ y ‘El vestido y los tocados típicos de Cornualles’, nel Palaciu de Campusagráu. D’igual forma, del xueves al domingu va vivise una edición nueva de Meses Celtes, xornaes gastronómiques nos que dellos establecimientos d’Avilés van ufrir platos tradicionales celtes.