El Beasain, piedra cabera nel camín a Segunda División B pal Sporting B

|
Beasain 2016-2017

El conxuntu vascu, cuartu del so grupu, eliminó al Lorca FC B y al Cacereño.

Los de José Alberto López eviten un desplazamientu llargu y el calor, gran enemigu pa los equipos norteños nestes fases d'ascensu, na eliminatoria definitiva pol ascensu a Segunda División B. El sortéu empareyó al Sporting B col Beasain, únicu cuartu clasificáu que llegó a la tercera ronda de los play-offs.

Los guipuzcoanos, que nun pisen la categoría de bronce dende'l 2003, son un equipu sólidu y con oficiu, como amosaron esti domingu pasáu en Cáceres pa defender el 1-0 algamáu na ida en Loinaz, finando'l partíu con un 2-1 que-yos dio'l pase. Na ronda anterior, tamién como llocal, derrotaron por 5-0 al filial del equipu murcianu recién ascendíu a Segunda División A, defendiendo bien la renta na vuelta (2-0).

El Sporting B va desplazase a tierres vasques esta fin de selmana pa xugar el domingu a les 19.30 hores, siendo la vuelta en Mareo'l 24 o 25 de xunu. Como anéudota, l'ascensu últimu del filial roxiblancu, nel 2008, foi contra otru equipu d'Euskal Herria, el Zamudio, col que se vio les cares esta temporada en Copa Federación, con trunfu tamién xixonés pese a tar una categoría perbaxo.

Semeya propiedá del Beasain Kirol Elkartea.

Contador Estadistiques