El balón y la bicicleta garren el protagonismu

Con permisu de los Xuegos Olímpicos, que viven la so recta final, el retornu de les competiciones de fútbol y el comienzu de la Vuelta atraen l'atención de los aficionaos.

El partíu ente'l Mirandés y el Getafe, de Segunda División, va abrir a les 20 hores de güei les competiciones profesionales de fútbol nel Estáu. 45 minutos depués encargaránse de facer lo propio en Primera Málaga y Osasuna, pa continuar a les 22 hores con un Deportivo-Eibar.

Los equipos asturianos nun van debutar hasta'l domingu. El Sporting va abrir la Lliga en casa contra'l duru Athletic Club, choque que va principiar a les 18.15 hores. Pela so parte, l'Uviéu va estrenase nel Nuevo José Zorrilla nun partíu que ta marcáu pol horariu escoyíu por la Lliga de Fútbol Profesional: les 22.30 hores. Por ello, la presencia de siguidores azules en Valladolid va vese amenorgada.

En Segunda División B y Tercera, tamién comienza la competeición esta fin de selmana. Na categoría de bronce, el Caudal va recibir al Racing Club Ferrol mañana a les 18.30 hores, mentes que'l Lealtad visita'l domingu, a les 17 hores, al Boiro, equipu debutante na categoría.

Trés etapes n'Asturies

Ourense va ser mañana el puntu de partida, con una contrarreló por equipos, d'una edición nueva de la Vuelta que, como ye vezu, va pasar per Asturies. La llegada del pelotón a les nueses carreteres ta prevista pal domingu 28, con una etapa con salida de Cistierna y final nel Naranco. El día siguiente va tener llugar la mítica ascensión a los Llagos de Cuadonga, tres salir de Llugones y, depués una xornada de descansu, el Muséu del Xurásicu va acoyer l'aniciu d'una xornada que va llevar a los corredores hasta Peña Cabarga.

La ronda, que sigue ensin respetar la toponimia oficial asturiana, va contar cola presencia d'Alberto Contador, Chris Froome, Alejandro Valverde y Nairo Quintana, rellación de la que seguramente saldrá'l vencedor. L'asturianu Samuel Sánchez, que va de xefe de files del BMC, tien como oxetivu finar ente los diez primeros.