El Bahrain-Merida renueva a García Cortina per dos temporaes

|
El Bahrain-Merida renueva a García Cortina per dos temporaes

"Toi mui contentu por siguir nel equipu dos años más", afirmó'l xixonés, protagonista nes etapes asturianes de La Vuelta.

La carrera profesional d'Iván García Cortina, de 22 años, sigue imparable y el conxuntu Bahrain-Merida nun duldó n'atar al asturianu pa les dos próximes temporaes. La so actuación en La Vuelta, tres una campaña a mui bon nivel, sirvió p'adelantar un alcuerdu que se zarró ayeri.

El sábadu protagonizara una de les escapaes llargues del día, y el domingu llegó en solitariu a Cuadonga, finando les sos esperances de victoria a les puertes de La Güesera, cuando'l grupu de favoritos alcanzólu. Nun comunicáu, l'equipu asiáticu refierse al xixonés "como ún de los mozos con más talentu del mundu", destacando les sos cualidaes pa clásiques y como gregariu, asina como'l so bon carauter y comportamientu como compañeru d'equipu.

Brent Copeland, manager xeneral, destacó que García Cortina "tien un mui bon marxe de meyora y vamos ayudalu a algamar los sos ésitos". "Creemos que tolos siguidores van tar contentos d'esta noticia", añadió.

Pela so parte, l'asturianu apuntó que "el Bahrain-Merida ye'l meyor equipu p'ameyorar y deprender nes más importantes carreres UCI del calendariu, como les clásiques. Toi mui contentu por siguir dos años xunto con estos increíbles compañeros y téunicos".

Semeya: Iván G. Cortina subiendo a Les Praeres na Vuelta a España 2018.

Contador Estadistiques