El BA esixe l’abolición de la deuda esterna si peligra la vida

El Bloque por Asturies criticó la situación de probitú que viven millones de persones internacionalmente. Criticaron que les midíes internacionales “empeoraron” la situación y llamaron a abolir la deuda esterna si la población ta en peligru.

Dende’l BA consideren que toes les persones afectaes tán “condenaes a pagar una deuda esterna illexítima qu’enxamás crearon y que nin-yos benifició”. D’esti mou, defenden que’l Estáu español tien la “responsabilidá d’impedir y resolver situaciones d’endeudamientu insostenible acordies al Consensu de Monterrey”.

“Les respuestes a la crisis fueron una continuación de polítiques que yá fracasaron nel pasáu y que tán xenerando abondos impactos sociales, económicos, ecolóxicos y climáticos”, argumenta’l Bloque.

Esponen amás qu’estes midíes aumenten “peligrosamente los niveles d’endeudamientu de tol mundu y provoquen l’empobrecimientu da la población”, exemplificándolo en consecuencies como “pérdides masives d’empléu y salarios” o “una concentración mayor del control corporativu y la explotación de recursos naturales”.

Alternatives a la deuda
El Bloque por Asturies señala tamién que midíes como la reforma de los créditos FAD o la creación de nuevos mecanismos xeneradores de deuda “fueron ocasiones perdíes”. “Son necesaries regles clares de financiación responsable, al empar que procesos xustos, trasparentes y equitativos pa iguar problemes nel pagu de la deuda”, planteen.

D’esti mou, la organización d’izquierda nacionalista sumóse a la “Selmana d’Acción Global contra la Deuda” y a la campaña “¿Quién debe a quién?”, al traviés de les que llamen, ente otres coses, a l’abolición de la deuda esterna “cuando’l pagu ponga en peligru la vida de los ciudadanos” y al reconocimientu de la deuda ecolóxica.