El 87 por cientu de los llectores d’Asturies.com refuga la celebración del festival aereu de Xixón

La práutica mayoría de los usuarios d’Asturies.com que participaron en ‘Conceyu Abiertu’ nun ve bien la celebración del ‘Festival Aéreo de Gijón’. Dende hai once años, aviones y helicópteros militares vuelen pel cielu de Xixón nel mes de xunetu.

La entruga plantegada nesta ocasión yera ‘¿Ta a favor de la celebración del ‘Festival Aéreo de Gijón’?’, a lo qu’un 87 por cientu respondió que ‘Non’, por un 13 por cientu que señaló que ‘Sí’. Pese a asistir a esti eventu miles de persones de dientro y fuera de Xixón, una gran parte de la ciudadanía movilízase contra él polos valores bélicos que promueve y amuesa’l so malestar pola so celebración. Asina, viense entamando una Folixa pola Paz nel Muséu del Pueblu d’Asturies coincidiendo col certame.

Dende esti momentu yá ye posible participar nun ‘Conceyu Abiertu’ nuevu. Nesta ocasión prestaríanos conocer la opinión de los nuesos usuarios sobre la negativa inicial, un añu más, del Comité Organizador del Descenso Internacional del Sella de dexar competir a Beatriz Manchón y Manuel Busto na categoría K-2 senior. Ello obligaría a la piragua a inscribise en K-2 mesta, polo que nun optaríen a puestos de salida que-yos permita lluchar pola prueba qu’esti sábadu va xunir pel ríu Seya les poblaciones de Les Arriondes y Ribeseya.