El 86,31 por cientu de la militancia d'IX decide presentase en solitariu a les eleiciones del 2019

A falta de contabilizar el votu per corréu.

Asturies ye l'únicu territoriu onde Izquierda Unida nun va dir en coalición con Podemos y Equo a les eleiciones autonómiques de xunu del 2019. La militancia d'Izquierda Xunida d'Asturies decidió na consulta celebrada'l xueves pasáu acudir en solitariu con un proyeutu propiu a les mesmes depués de que la consulta federal fecha al respeuto de la confluencia algamara un 66,02 por cientu d'apoyos nel país.

Sicasí, l'alcuerdu ente les dos direiciones llevaba a Madrid a respetar los resultaos de la consulta asturiana que, a falta de contabilizar el votu per corréu, rexistró un 86,31 por cientu de respuestes 'Non' a la entruga '¿Quieres que Izquierda Unida en Asturias vaya en coalición con Podemos en las próximas elecciones?', esto ye 946 votos, por 152 al 'Sí' (14 por cientu). La participación foi del 54 por cientu.

"La militancia faló", destacó el coordinador xeneral, Ramón Argüelles, que nun descarta que nel futuru, depués del eleiciones, puedan llegar a un pautu pela izquierda que creemos "que ye mui necesariu". Pela so parte, Daniel Ripa, secretariu xeneral de Podemos Asturies, aseguró respetar el resultáu de la consulta y afirmó que ve espaciu pa siguir trabayando conxuntamente con IX "poniendo per delantre los intereses xenerales de los asturianos".

Na semeya, Argüelles nel momentu de votar.