El 85 por cientu de los llectores d’Asturies.com cree que nun se tán tomando les midíes necesaries pa evitar quemes

El mes pasáu cumplíase l’aniversariu de la quema qu’amburó grandes estensiones de terrén n’occidente. Trescurríu poco más d’un añu d’aquel socesu desagradable, la gran mayoría de los usuarios d’Asturies.com que participaron en ‘Conceyu Abiertu’ cree que’l Gobiernu nun ta tomando les midíes necesaria pa evitar episodios similares al vivíu en Bual y El Franco.

La entruga plantegada yera ‘¿Piensa que se tán tomando les midíes necesaries pa que nun se repitan incendios como’l del occidente d’hai un añu?’, a lo qu’un 85 por cientu respondió que ‘Non’, por un curtiu 2 por cientu qu’apuntó que ‘Sí’. Mentes, un 13 por cientu señaló que ‘Faiga lo que se faiga, ye inevitable que los haya’.

Nel de triste recuerdu del añu pasáu, iniciáu de manera intencionada en Bual y qu’afeutó tamién El Franco, amburaron alredor de 2.500 hectárees de monte. Entovía nun se conocen los responsables.

Dende esti momentu yá ye posible participar nun ‘Conceyu Abiertu’ nuevu. Dada la situación llaceriosa que presenta la rede ferroviaria de cercaníes n’Asturies, queremos conocer si los nuesos usuarios empleguen el tren de manera habitual o non.