El 85 por cientu de los llectores d’Asturies.com nun ta conforme cola promoción turística del país

Asturies, pese al potencial turísticu que tien, nun acaba de consolidase como destín, sobre manera ente los visitantes de fuera del Estáu. Un 85 por cientu de los nuesos usuarios nun ve afayadiza la promoción que fai’l Gobiernu.

España situóse nel 2013 como’l tercer estáu del mundu que más turistes recibe, per detrás d’Estaos Xuníos y Francia, pero’l país nun ye quien a atrayer visitantes estranxeros. Pese a la consolidación de l’autopista del mar con Naunnt, el númberu de visitantes menguó mientres l’añu pasáu cuando’l restu de territorios vecinos rexistró un aumentu, según reza un estudiu del Instituto de Estudios Turísticos (IET). La falta de conexones aérees y el desconocimientu qu’esiste d’Asturies fuera del Estáu podríen esplicar esta situación. Al menos, asina lo entienden los usuarios d’Asturies.com que participaron nel nuesu ‘Conceyu Abiertu’: el 85 por cientu cree que la promoción que fai’l Gobiernu del país como destín turísticu nun ye l’afayadiza, por un 9 por cientu que piensa lo contrario y un 7 que votó la opción ‘Nun sé’.

Al respeuto, Asturies repite presencia nel XV Salon International du Tourisme de Nantes, que va celebrase esta fin de selmana nesta población de la Breizh histórica, pa promocionase ente’l públicu francés. Esta cita va reunir a más de 450 espositores y espera 40.000 visitante, sobre manera pareyes de 30 a 60 años que viaxen pela so cuenta, pa les que’l barcu que xune El Musel con esta ciudá ye too un atractivu.

Otra manera, yá ye posible votar nun ‘Conceyu Abiertu’ nuevu. Nesta ocasión, coincidiendo colos XXII Xuegos Olímpicos d’Iviernu que tán teniendo llugar en Sochi –ensin representación asturiana–, queremos conocer si son aficionaos o prauticantes de los nomaos ‘deportes d’iviernu’.