El 84 por cientu de los llectores considera que'l 21-A va provocar avances hacia la oficialidá

El 21 d’abril del 2018 foi un día históricu pal movimientu de reivindicación llingüística. Miles de persones, cerca de 30.000 según los organizadores, demandaben peles cais d’Uviéu la oficialidá, una manifestación que va provocar avances nel procesu según opinen un 84 por cientu de los nuesos usuarios nel 'Conceyu Abiertu'.

Nesta ocasión plantegamos la entruga ‘¿Considera que la manifestación 'L’asturianu llingua oficial ¡agora!' del 21-A va provocar un avance nel procesu?’. Un 84 por cientu posicionóse pol ‘Sí’, mentes qu’un ‘Non’ votó pola opción ‘Non’.

Esta tarde hai una movilización nueva en defensa de la oficialidá del asturianu y del gallego-asturiano, convocada tamién pola Xunta pola Defensa de la Llingua Asturiana (XDLA) al igual que la celebrada hai catorce díes. Ye la tradicional pol Día de les Lletres Asturianes baxo’l lema ‘L’asturianu llingua oficial ¡yá!’, con salida a les 19.30 hores de la Estación del Norte (RENFE) d’Uviéu y final nel Teatru Campoamor, onde l’Academia de la Llingua Asturiana (ALLA) celebra a les 20.30 hores el so actu académicu.

Esti Día de les Lletres Asturianes celébrase nun momentu clave pal futuru de los dos idiomes, yá que l’alderique al rodiu la cooficialidá ta nestos momentos na axenda de los partíos políticos con representación na Xunta Xeneral. Precisamente la XDLA tien en marcha una campaña de nome ‘Proyectu 2018 pola Oficialidá’ pa entamar col procesu de reforma del Estatutu d’Autonomía nesta mesma llexislatura.