El 84 por cientu de la población yá tien la pauta completa de vacunación

|
Vacunación ensin cita nel Campoamor

Son 855.821 persones, mentes que'l refugu a recibir les dosis reduzse a 7.944. El llunes hebo 12 casos nuevos de COVID-19 y el martes, 10.

Asturies yá va pol 84 por cientu de población vacunada, cifra que taría cerca de la inmunidá de grupu, asitiáu polos espertos nel 85 por cientu llueu de l'apaición de la variante delta del coronavirus SARS-CoV-2. Nun primer momentu, cuando l'alfa yera la predominante, marcábase nel 70 por cientu.

En concreto tien la pauta completa, con datos correspondientes a ayeri, el 83,95 por cientu, mentes que cuenta con una dosis el 85,86 por cientu. No que respeuta a la población diana, los mayores de 12 años, los porcentaxes algamen yá un 91,38 y un 93,42 por cientu, de manera respeutiva.

El total de dosis alministraes algama la cifra de 1.652.291. Menos d'un 1 por cientu refugó hasta'l momentu recibir la vacuna, en total 7.944 persones.

Dos finaos

La Conseyería de Salú, a falta de la espublización de los datos oficiales, comunicó 12 casos nuevos el llunes y 10 el martes –l'actualización rexistra 1 menos por un duplicáu en díes previos–. Son cifres asemeyaes a la de les xornaes últimes, con una media de 12 contaxos diarios rexistrada la selmana pasada.

A 7 díes la tasa de positividá yera'l domingu del 1,13 por cientu –cola actualización baxó al 0,98 por cientu–. Ayeri la diaria, con 2.139 pruebes de diagnósticu d'infeición activa, quedó nun 0,65 por cientu.

Hai que llamentar la muerte d'una muyer de 88 años el llunes y un home de 86 ayeri. Un total de 2.068 persones perdieron hasta la fecha la vida nel andanciu cola enfermedá causada pol coronavirus SARS-CoV-2.

Tán ingresaos 20 pacientes con sospecha o confirmación de COVID-19, 2 menos que'l domingu. Mentes na UCI caltiénense otros 11 hospitalizaos.

Na semeya, ciudadanos faen filera n'Uviéu pa recibir vacuna ensin cita a lo primero d'esti mes.

 

Contador Estadistiques