El 8 de setiembre va tener manifestación soberanista n’Uviéu

Baxo’l lema ‘Asturies tiempu de nós’ van salir el domingu, 8 de setiembre, numberoses asturianes y asturianos pa convertir el Día de la Nación Asturiana nuna xornada reivindicativa. #LluchandoPolaSoberanía entama una marcha a les 12.30 hores énte’l Reconquista y una xinta popular nel Paragües.

Depués de treslladar l’actu a Cangues d’Onís l’añu pasáu énte la visita de los reis d’España a Cuadonga, con una marcha de protesta previa baxo’l lema ‘Asturies nun tien rei’ con salida de Les Arriondes, la manifestación soberanista con motivu del 8 de setiembre torna a Uviéu. Al igual que n’años anteriores, ésta va contar con delles paraes en llugares destacaos de la ciudá pa denunciar delles situaciones y reivindicar lluches sociales.

La salida va ser a les 12.30 hores frente al Eurostars Hotel de la Reconquista pa finar na Plaza'l Paragües, onde va celebrase una xinta popular. Darréu, yá de tarde, van entamase talleres formativos nel llugar.

Ruta de monte'l llunes

La bona esperiencia de la marcha ‘Asturies nun tien rei’ el pasáu 8 de setiembre lleva a #LluchandoPolaSoberanía a aprovechar que’l llunes ye festivu pa da-y continuidá. Nesta ocasión va desendolcase pela zona de Grau, en concreto per escenarios de combates del 1808 asina como peles trincheres y restos bélicos del Frente del Nalón na Guerra Civil.

La salida ta prevista a les 10.30 hores del apeaderu de Peñaflor y va consistir nun percorríu circular de 14 quilómetros. Al so final va xintase en comuña y va entamase un conceyu pa organizar próximes reivindicaciones.