El 67 por cientu de los usuarios d’Asturies.com afirma usar habitualmente’l tren de cercaníes

|

La situación llaceriosa que ta viviendo la rede ferroviaria de cercaníes n’Asturies y que ta provocando protestes ciudadanes, tamién esmolez a los llectores d’Asturies.com. Un 67 por cientu de los que participaron nel nuesu ‘Conceyu Abiertu’ afirma usar el tren de manera habitual pese a la so situación actual.

La entruga plantegada nesta ocasión yera ‘¿Usa habitualmente los trenes de cercaníes n’Asturies?’, con un 67 por cientu que respondió ‘Sí’ por un 33 por cientu que señaló que ‘Non’ porque ‘anguaño nun ye una alternativa práutica a otros medios de tresporte’. La situación de Feve, con numberoses cancelaciones y retrasos pola falta de personal y pol estáu de les infraestructures, ta condenando a la vía estrecha y a les cercaníes al so desaniciu, dalgo que vien denunciando la plataforma d’usuarios SOS Tren, qu’esti mes entamó un viaxe de protesta d’época ente Avilés y Xixón cola participación de dos centenares de persones.

Dende esti momentu yá ye posible participar nun ‘Conceyu Abiertu’ nuevu. Nesta ocasión queremos conocer, tres l’accidente nos Llagos qu’afeutó a unos turistes qu’entraron nel llagu Ercina conxeláu y que vieron frayar el xelu pol so pesu, la opinión de los nuesos llectores sobre si’l nuesu patrimoniu natural tien la suficiente vixilancia o non énte la llegada de numberosos visitantes.

Contador Estadistiques