El 67 por cientu de los contaxos n’Asturies yá son de la variante inglesa

El conseyeru de Salú, Pablo Ignacio Fernández Muñiz, solicitó nel Conseyu Interterritorial del Sistema Nacional de Salud que nun haya movilidá nel Estáu hasta’l fin del estáu d’alarma’l 9 de mayu. Tres la xunta confirmó que’l 67 por cientu de los contaxos n’Asturies yá son de la variante inglesa del coronavirus SARS-CoV-2.

“Si n’España ta teniendo una consideración del 50 por cientu de los casos nuevos, n’Asturies los últimos datos que tenemos del Llaboratoriu de Viroloxía del HUCA ye que yá llega al 67 por cientu, polo que’l riesgu equí ye altu”, apuntó. Por esti motivu solicitó ayeri a la ministra y al restu de conseyeros que “los zarros perimetrales autonómicos y por provincies sigan nel tiempu hasta que s’acabe polo menos l’estáu d’alarma, incluyendo por supuesto la Selmana Santa”.

Na xunta tamién s’informó sobre la decisión adoptada pola Comisión de Salú Pública sobre los grupos de vacunación, dando prioridá depués del grupu de mayores de 80 años a los de 70-79 años y darréu, el de 60 a 69 y el de menores de 60 con condiciones de riesgu altu de contrayer la COVID-19, toos coles de Pfizer y Moderna. Mentes, la d’AstraZeneca va destinase a un grupu, entovía por concretar, nel rangu d’edá de 45 a 55 años.

Sobre la situación epidemiolóxica d’Asturies, apuntó que “siguimos nuna tendencia d’ameyoramientu continuu, anque entovía tamos en niveles altos”. El Ministeriu de Sanidá encamientó a les automíes a caltener les restricciones pa siguir cola baxada de cifres que se ta rexistrando en tol Estáu.