El 63 por cientu de los llectores d’Asturies.com ve en Podemos un proyeutu de llargu percorríu

El 25 de mayu del 2014 va pasar a la historia pola apaición de Podemos na escena política estatal. El 63 por cientu de los usuarios d’Asturies.com considera qu’esti proyeutu nacíu de la indignación ciudadana va tener un llargu percorríu.

 

Neses eleiciones al Parllamentu Européu la formación liderada pol madrilanu Pablo Iglesias algamó 5 escaños con casi’l 8 por cientu de los votos, situándose como cuarta fuercia nel Estáu, namái per detrás del PP (16), el PSOE (14) y La Izquierda Plural (6). N’Asturies, mentes, superaba inclusive a la coalición de partíos encabezada por Izquierda Xunida al sumar el 13,66 por cientu de votos. Pa un 63 por cientu de los nuesos llectores estes cifres espectaculares van tener continuidá nes próximes eleiciones nacionales y municipales, y nes estatales del 2016, afitando’l proyeutu de Podemos como de llargu percorríu,mentes qu’un 23 por cientu cree qu’estos resultaos son flor d’un día. Por contra, un 14 por cientu de les persones que participaron en ‘Conceyu Abiertu’ calcó la opción ‘Nun sé’.

 

Dende esti momentu yá ta abiertu un ‘Conceyu Abiertu’ nuevu. Nesta ocasión queremos conocer si los usuarios d’Asturies.com ven con buenos güeyos la propuesta de la Conseyería d’Educación, Cultura y Deporte a los escolinos y escolines de Primaria, cola entrada de la LOMCE, d’ufrir Llingua Asturiana –Gallego-asturiano nel so ámbitu– como materia de llibre configuración cola asignatura de Cultura Asturiana como alternativa.