El 57 por cientu de los usuarios d’Asturies.com desaprueba la llegada de los radares nuevos al país

|

Una midida más pa recaudar perres. Asina ven los llectores d’Asturies.com que participaron en ‘Conceyu Abiertu’ la llegada a les carreteres del país d’ocho radares que detecten irregularidaes dientro del vehículu, como nun llevar el cinturón de seguridá.

La entruga plantegada nesta ocasión yera ‘¿Qué-y paez la llegada a Asturies de radares que detecten irregularidaes dientro'l vehículu como l'usu del teléfonu móvil?’, a lo que un 57 por cientu votó pola respuesta ‘Nun me presta. Ye una midida pa recaudar perres’. Mentes, un 43 por cientu considera que ye ‘Dalgo positivo, yá que va ameyorar la seguridá vial’ al evitar que los conductores faigan usu del teléfonu móvil en marcha.

La Direición Xeneral de Tráficu (DXT) yá tien instalaos estos ochos radares en víes del país, anque entovía nun funcionen: na A-66, na A-8 (dos), na AI-81, na AS-266, na A-8, na A-66, na N-632 y na AI-81. D’esta forma, súmense a los 24 fixos de velocidá y el de tramu de l’Autovía del Cantábricu en Villaviciosa yá esistentes.

Dende esti momentu ye posible participar nun ‘Conceyu Abiertu’ nuevu. Nesta ocasión queremos conocer la opinión de los nuesos usuarios sobre’l tratamientu que se da’l procesu de recuperación toponímica en dellos medios de comunicación, ente ellos l’ente públicu de comunicación RTPA.

Contador Estadistiques