El 54% del PIB asturianu sal d'ayudes

Les ayudes del Estáu y la UE faen elles soles más del 54% del Productu Interior Brutu asturianu, afitando a la nuestra como la segunda comunidá con más dependencia de l'Alministración central y les ayudes comunitaries

en tol estáu.

L'estudiu "Les balances fiscales de les comunidaes autónomes" acabante d'editar pola Fundación BBVA y fechu pol caderalgu de la Universidá de Valencia Ezequiel Uriel demuestra qu'Asturies ye la segunda comunidá más dependiente del estáu y d'Europa, superada namás por Extremadura, onde les ayudes de fuera son el 62,36% del PIB. La siguiente nesta llista de dependencia económica ye Andalucía (52,35% del PIB) la tercer comunidá española "oxetivu 1" de la UE, mientres que les úniques comunidaes que nun dependen d'ayudes nel so PIB, esto ye, qu'aporten más de lo que reciben a la caxa del estáu, son Cataluña, Madrid y Baleares. Euskadi, y Navarra , que tienen sistemes de financiación propios, y les Canaries, que tien delles particularidaes fiscales, nun puen comparase nos mesmos términos coles demás comunidaes d'esti estudiu, que contempla'l periodu ente 1991 y 1996, anque al dicir de los sos responsables les conclusiones puen estrapolase hasta agora.

Ente esos años (1991-96) les ayudes n'Asturies supunxeron 4.805 euros por habitante, contra una media estatal de 3.743,2 euros. L'informe rescampla una contradicción de la economía asturiana na ratio de lo qu'aporta y lo que recibe, y ye que siendo la 12ª comunidá cola renta per cápita más alta d'España Asturies ye la segunda que más ayudes recibe, lo que demuestra'l pesu de les prestaciones sociales (prexubilaciones sobremanera) nel total de l'ayuda recibida .