El 42,4 por cientu de los muertos n’accidentes de tráficu tomaron alcohol o drogues

L’informe del 2010 del Instituto Nacional de Toxicología revela que’l 42,4 por cientu de les persones muertes n’accidentes de tráficu dieron positivu n’alcohol o en drogues nes pruebes forenses. Hai un aumentu nel consumu de drogues de diseñu.
 
De toles persones que dieron positivu nes pruebes toxicolóxiques, l’alcohol taba presente en polo menos un 73 per cientu, con tases superiores a 0,3 gramos per llitru de sangre. La llenda pa poder conducir nel Estáu ye de 0,5 gramos per llitru de sangre pa los conductores esperimentaos y 0,3 gramos per llitru de sangre pa los noveles y los profesionales. Amás, el 76,9 por cientu d'estes persones que dieron positivu nes pruebes d’alcohol superaba la tasa considerada delitu pol Códigu Penal de 1,2 gramos per llitru.
 
Mentes, el 29,4 por cientu de los muertos por accidente de tráficu nel 2010 dieron positivu en drogues y el 19,5 por cientu en psicofármacos, siendo la cocaína, el cannabis y les anfetamines, por esi orde, les drogues que con más frecuencia apaecen al realizar l’análisis toxicolóxicu de los muertos n’accidente de tráficu. Asina, la cocaína apaez nel 47,6 por cientu de los positivos por droga; el cannabis nel 42 por cientu; y les anfetamines nel 6,5 por cientu.
 
Juan Luis Valverde, direutor del Instituto Nacional de Toxicología y Ciencias Forenses, señaló que la proporción de positivos d’alcohol y droga caltúvose más o menos estable dende’l 2006, pero resaltó “una xuba” que “paez imparable” de presencia de psicofármacos, les llamaes drogues de diseñu, qu’empiecen a tener una “importancia” nes muertes d'accidentes de tráficu. Valverde presentó los datos del informe na xornada ‘Juntos podemos salvar millones de vidas’, celebrada nel Ministeriu de Sanidá, Política Social y Igualdá, na que tuvo acompañáu pola ministra Leire Pajín; Pere Navarro, direutor de Tráficu; y Caridad Hernández, direutora xeneral de Rellaciones cola Alministración de Xusticia.