El 30 de payares fina’l plazu pa la entrega d’obres pal concursu de narraciones curties de Llaviana

El vienres próximu, 30 de payares, ye’l día caberu pa que la xente interesao entregue’l so rellatu pa participar nel XI Concursu de Narraciones Curties Conceyu de Llaviana. El primer premiu ye de 400 euros y el segundu, de 150.

Los rellatos, de temática llibre, han de ser inéditos, tar escritos en llingua asturiana estándar y tener una estensión mínima de cinco fueyes y máxima, de venti. Cada participante namái pue presentar una obra, siempre baxo nomatu. Ésti ha d’aparecer na plica axunta con toles señes: nome completu, DNI, direición, teléfonu de contautu y currículum. Les obres a concursu han de presentase por cuatriplicáu y mecanografiaos en DIN-A4 a doble espaciu per una sola cara. El plazu pa la so entrega, na direición ‘Oficina de Normalización Llingüística de Llaviana / XI Concursu de Narraciones Curties n’Asturianu Conceyu de Llaviana / Plaza Armando Palacio Valdés númberu 1 / 33980 / La Pola Llaviana’, va finar el vienres próximu, 30 de payares, a les 14 hores.

Un xuráu formáu por dos representantes de la Conceyalía d’Educación, Política Cultural y Participación Ciudadana, ún de la Rede de Normalización Llingüística nos Conceyos y otru de l’Academia de la Llingua Asturiana, va decidir les persones que van llevase los dos primeros premios, d’un valor de 400 y 150 euros. Éstos van entregase nel mes d’avientu, anque’l xuráu tamién tien potestá pa declarar el concursu desiertu. El ganador del añu pasáu foi Pablo X. Suárez, por ‘El bichu grande’, siendo’l segundu premiu pa Pablo Rodríguez Medina, por ‘La vuelta’ y el terceru –qu’esti añu nun lleva recompensa económica– pa David Fernández Fernández, por ‘La espera interminable’.