El 28 d’abril ye la fecha escoyida por Sánchez pa celebrar les eleiciones

|
Pedro Sánchez convoca eleiciones anticipaes

El presidente del Gobiernu estatal, Pedro Sánchez, punxo fin a dellos díes de rumores y anunció esti vienres, como s’esperaba, la fecha pa la celebración de les eleiciones anticipaes depués de nun poder sacar alantre los sos presupuestos. Finalmente va ser el 28 d’abril, lo qu’evita un ‘superdomingu’ eleutoral el 26 de mayu.

Tres casi 19 minutos de discursu a la salida del Conseyu de Ministros, nel que repasó les razones que llevaron a la presentación de la moción de censura a Mariano Rajoy y el llabor del so Gobiernu nestos ochos meses llargos de mandatu, Sánchez señaló que “en exerciciu de les facultaes que tengo como presidente del Gobiernu d’España, y previu alderique del Conseyu de Ministros, propunxi la disolución de les Cámares y la convocatoria d’eleiciones xenerales, pal día 28 d’abril”. Foi depués d’asegurar que’l bloquéu de los Presupuestos Xenerales del Estáu nel Congresu, esti miércoles, provocara-y una disyuntiva: “O continuar gobernando con unos Presupuestos que nun son los de nueso y qu’inclumplen les esixencies sociales que necesita’l nuesu país, o bien creer, como creo, qu’España nun tien un minutu que perder”, esto ye, esplicó, o “nun facer nada” o “convocar y dar la pallabra a los españoles”, escoyendo “la segunda”.

Refugáu’l 14 d’abril, por ser mui cercanu, y tamién el facer concidir les Estatales coles Europees, Nacionales y municipales del 26 de mayu nun ‘superdomingu’ eleutoral, que descartaron dende un primer momentu los barones socialistes, la cita coles urnes va ser finalmente’l 28 d’abril. Asina, tolos ciudadanos van tener que dir a votar dos veces en menos d’un mes, coincidiendo la campaña eleutoral de les Xenerales coles vacaciones de Selmana Santa, yá qu’esta va principiar el día 12.

Otra manera, la constitución de les Cortes va pisase cola campaña de les eleiciones del 26 de mayu, que va comenzar el 10 de mayu, lo que podría allargar el procesu d’eleición del presidente del Gobiernu a la espera de los resultaos de la xornada eleutoral énte la necesidá más que previsible de llegar a alcuerdos ente partíos políticos pola ausencia de mayoríes.

Semeya de Pool Moncloa/Fernando Calvo.

Contador Estadistiques