“El 25-M tien que ser la nuesa fiesta de soberanía popular”, defende Ripa

“Ye una bona noticia que’l 25 de mayu por fin tenga conmemoraciones oficiales”, apuntó Daniel Ripa, secretariu xeneral de Podemos, que considera que “tien que ser la nuesa fiesta de soberanía popular”. El voceru de la formación morada na Xunta Xeneral cree qu'esta fecha pue convivir col 8 de setiembre, “una con un sentíu más cultural y otra con un sentíu más políticu”.

Ripa acudió esta mañana al actu entamáu pol Gobiernu nel Palaciu del Conde de Toreno, una iniciativa bien recibida pol diputáu. “Cuando’l pueblu taba amenazáu, cuando les élites taben posicionaes del llau de los invasores franceses, el pueblu asturianu llevantóse na Xunta Xeneral y reclamó esa soberanía pa poder organizar la defensa d’Asturies”, rellató’l diputáu, que calificó el momentu de “pioneru, non solamente na historia d’Asturies, sinón na historia d’España y ye un momentu que debería ser conmemoráu y reconocíu”.

Nesi sen, apuntó que “sorprende l’escaezu oficial, l’escaezu de la nuesa historia, onde, per primer vegada, el pueblu asturianu facíase pueblu, digamos, nun sentíu modernu y, poro, un actu que tien que tener una conmemoración social y política”. Porque “si’l 8 de setiembre ye una conmemoración festiva, cultural y relixosa, de dalguna manera el 25 de mayu tien que ser la nuesa fiesta de soberanía popular, la nuesa fiesta política que reconoza esa esistencia de la voluntá de ser, de la voluntá de construyir, de la voluntá d’autoorganizase, de la voluntá de defender a Asturies y, poro, un fechu del pasáu que proyeuta hacia’l futuru un horizonte de comunidá, de pueblu y d’autoorganización democrática”.

“Esa conmemoración tien que ser en paralelo y hai espaciu pa dos festividaes: una con un sentíu más cultural y otra, con un sentíu más políticu”, insistió Ripa, que defende que’l 25 de mayu “adquiera una fecha nel calendariu, una fecha de festividá oficial y un momentu de reconocimientu d’Asturies como pueblu y como democracia”.

Na semeya, Ripa dialoga con Dolores Carcedo, vocera del grupu parllamentariu socialista enantes el actu conmemorativu del 25 de mayu d'esta mañana,