El 25 d’ochobre va dase a conocer el ganador del XX Concursu de Cuentos Curtios d’El Garrapiellu

El martes próximu, 25 d’ochobre, va fallase’l XX Concursu de Cuentos Curtios de la Tertulia Cultural El Garrapiellu. Dende la organización tán mui satisfechos pola alta participación d’esta edición del certame, superior a la de los años anteriores.
 
“La Tertulia Cultural El Garrapiellu felicítase pola alta participación nel concursu añal de cuentos curtios que fallaráse esti 25 d’ochobre. Esti certame lliterariu, ya decanu de los premios n’Asturies, agradez nel alma l’esfuerciu a tolos autores que lleven participando estos caberos venti años colos sos rellatos”, resalta esti coleutivu nun comunicáu. Nestos momentos, les persones encargaes del concursu tán convocando a un xuráu pa que decida qué trabayu d’ente los presentaos ye’l merecedor de llevase’l primer premiu de 900 euros y cuál va recibir los 300 euros del accésit. Esti xuráu va tar compuestu por un escritor n’asturianu, un representante de l’Academia de la Llingua Asturiana, un maestru de Llingua Asturiana y el ganador de la edición del añu pasáu, Segio Buelga, persones que tomarán el testigu de xente del prestixu d’Humberto Gonzali, Inaciu Galán, Iris Díaz, Vicente García Oliva, Chechu García y Dolfo Camilo Díaz, ente otros.
 
La persona que se lleve’l XX Concursu de Cuentos Curtios va tener el privilexu d’incoporar la so obra al llibru qu’El Garrapiellu asoleya cada cuatro ediciones y que, nesta ocasión, va ver la lluz l’añu qu’entra. Ente la nómina de ganadores d’esti certame ta nomes perconocíos, munchos noveles cuando se llevaron el premio, como Pablo Rodríguez Medina, Xandro Martino, María Teresa González y Pablo Antón Marín Estrada.
 
Hai que destacar qu’esta edición del concursu tien llugar nun añu mui especial pa esti coleutivu, yá que, amás de cumplir venti años de vida, vien de recibir la medaya de plata de Xixón.