El 2013 principia con trés discos nuevos de música asturiana

Imanol Núñez, Fernando Valle Roso y Ensemble Ars Mundi protagonicen los trés primeros discos del añu de la discográfica EveryGoodSong. Trátense de trabayos d'estilos diferentes fechos n’Asturies na llingua del país.

De los trés, el más reivindicativu ye ‘La güelga’, d’Imanol Núñez, conocíu por ser cantante del grupu TrueQuedart. Nesti trabayu en solitariu, que cuenta cola producción musical y executiva de Michael Lee Wolfe, Núñez interpreta cantares de llucha y protesta que se caltienen na memoria del pueblu, como ‘La dispidida del mineru’, ‘Cuatro cosines d’amor’. ‘La güelga’ o ‘Bella Ciao’. Un discu que lleva a despertar la conciencia nestos tiempos duros no social.

‘Camín d’ayures’ ye tamién el primer discu en solitariu de Fernando Valle Roso. Pal so estrenu, el llangreanu interpreta cantares populares y composiciones feches por María González onde s’amiesten la tonada y la tradición. Un trabayu que supón un chorru d’aire fresco a la canción asturiana. Mentes, Ensemble Ars Mundi presenta ‘Música de cámara d'Asturies’, la primer incursión d’EveryGoodSong nel mundu de la clásica. L’ucraín Yuri Nashuskin dirixe esta formación que nesti álbum intepreta composiciones y cantares que representen la riqueza qu’hai n’Asturies, pieces que la orquesta de cámara consigue revalorizar.