El 18,7 por cientu de los asturianos identifícase con Asturies por un 5,3 que lo fai con España

El barómetru del CIS d’avientu del 2018 incluyó una entruga sobre'l sentimientu nacionalista. Un 72 por cientu diz sentise tan asturianu como español, mentes qu’un 8 por cientu considérase sólo asturianu y un 10,7 más asturianu qu’español; namái un 5,3 tien más identidá española (4 y 1,3 por cientu, respeutivamente).

Depués d’Euskadi (25,7 por cientu), Navarra (23,8) y Catalunya (20,7), Asturies, con un 8 por cientu, ye’l territoriu con un porcentaxe más altu de sentimientu de pertenencia únicamente a la so comunidá autónoma de los sos ciudadanos. En Galicia y Canarias, con tradición nacionalista, namái ye del 3,1 y 3 por cientu, de manera respeutiva, mentes qu’en Cantabria y Castilla-La Mancha nengún de los encuestaos escoyó esta opción.

Un 10,7 por cientu de los asturianu, mentes, considérase más asturianu qu’español, cifra qu’en Galicia llega al 22,4 por cientu. Sumaos dambes porcentaxes, vemos que’l 18,7 por cientu identifícase con Asturies, mentes que por España esta cifra baxa al 5,3 por cientu.

El 4 por cientu de los encuestaos n’Asturies siéntese únicamente español, cantidá superior a la rexistrada en Murcia (1,2 por cientu), Navarra (2,4), Galicia (2,6), Euskadi (2,7) y Extremadura (3,9) y inferior a Catalunya (7,2). Nel llau opuestu atopamos a Castilla-La Mancha (27,8). Castilla y Lleón (23,3) y la Comunidad de Madrid (23,1).

Pela so parte, el 1,3 por cientu diz tener más identidá española qu’asturiana, mesma cifra qu’Extremadura y la más baxa nesta estaya cola esceición única de Navarra, onde nadie nun optó por esta opción.

Los murcianos, murcianos y españoles

Un 89,5 por cientu de los murcianos siéntense tanto de Murcia como d’España, rexistrando’l porcentaxe más altu nesta estaya. Nel casu d’Asturies esta doble identificación ye del 72 por cientu, la tercer más alta, siendo Extremadura la segunda (88,2 por cientu).