El ‘Conceyu Abiertu’ organiza esti vienres una charra-debate sobre’l velu islámicu

‘Laicismu y fundamentalismu ante la prohibición del velu’ ye la charra-debate qu’organiza’l ‘Conceyu Abiertu’ pa esti vienres n’Uviéu. Martí Caussa va intervenir nesta actividá que tien como sede’l Llar Solidariu.
 
Caussa, editor del Plural del númberu 114 de la revista ‘Viento Sur’, va tratar sobre l’Islam y el tratu que se-y da nel Estáu. “Bien de conceyos siguen bloquiando la construcción de mezquites con tou tipu de sides. Delles escueles impidieron la entrada a una alumna musulmana por llevar pañuelu y al altu cargu de Xusticia qu'avaló esti derechu cesáronlu por esti motivu. Otros conceyos tomaron iniciatives pa prohibir el burka nos edificios municipales y llevantáronse voces pa prohibilu tamién na cai”, señala la nota de ‘Conceyu Abiertu’ sobre’l debate qu’organiza esti vienres. “Los discursos de dellos políticos, publicistes y medios de comunicación encerricen la islamofobia. Y la so progresión impulsa a otros políticos a sumáse o acobardálos pa encaráse con ella”, continúa la nota.
 
La hora d’entamu de la charra-debate ta prevista pa les 19.30 hores. La direición del Llar Solidariu ye La Gascona 12, baxu A, d’Uviéu.