Eixe entamó una visita guiada al campamentu romanu de Moyapán

Pal sábadu 27 ta prevista otra a los túmulos prehistóricos de Carondio.

L'asociación Eixe, de cultura ayandesa, continúa celebrando visites guiaes pa dar a conocer el patrimoniu del conceyu. Esti sábadu convocó a un bon grupu de xente pa desplazase pa les mines y campamentu romanu de La Freita y Moyapán, y conocer tolos detalles d'estos llugares de la mano d'Andrés Menéndez Blanco, miembru del equipu de Romanarmy.eu.

Menéndez Blanco va encargase tamién de la próxima visita qu'entama Eixe, pa lo que va contar col sofitu del so compañeru Valentín Álvarez Martínez. Nesta ocasión, el llugar escoyíu ye Carondio, col oxetivu de conocer los túmulos prehistóricos del llugar. Los interesaos en participar pueden apuntase nel Telecentru o na Biblioteca Municipal, amás d'al traviés del corréu electrónicu info.eixe@gmail.com, hasta'l vienres 26. La salida ta prevista a les 10.30 hores del sábadu 27 y el preciu de la inscripción ye de 5 euros, tresporte incluyíu.