EH Bildu entruga al Gobiernu estatal sobre "la desindustrialización que carez Asturies"

Diputaos del partíu vascu, que forma parte de la coalición Agora Repúbliques, na que ta incluyida Andecha Astur, aconceyaron en Madrid con representantes de trabayadores.

El xueves pasáu un autocar desplazóse a Madrid con miembros de la formación nacionaliega y de delles estayes de la Corriente Sindical d'Izquierda (CSI) n'empreses como ALSA, Delcom, Duro Felguera, Limpac, Vayven, Modultec, Danne, Vauste, Just Eat, Glovo, Llacera, Trefilería Moreda, Konecta y EBHISA, "en representación de toles empreses en cris que lluchen en Asturies polos drechos llaborales". Ellí esperábenlos Oskar Matute, Mertxe Aizpurua y Bel Pozueta pa conocer la so situación de primer mano.

D'igual forma, EH Bildu rexistró énte la Mesa del Congresu cinco entrugues pa respuesta per escrito d'Andecha Astur al Gobiernu estatal "sobro’l nueu procesu de desindustrialización que carez Asturies". L'entamu de les preguntes apunta que "ALSA, Alu Ibérica, ArcelorMittal, Asturiana de Zinc, Danone, Delcom, Duro Felguera, EBHI, General Dynamics, Just Eat, Konecta, Lacera, Mataderu Xixón, Modultec, MRT, SAD, Saint-Gobain, Serunion, Sespa, Vayen… Éstes y otres empreses, allugaes n'Asturies, dicen anguaño tar en situación de grave crisis, faciendo peligrar les sos inversiones, les ayudes públiques recibíes por dalgunes d'elles, los puestos de trabayu xeneraos y la estabilidá social, económica y llaboral d'Asturies".

Darréu, el documentu llanza diches entrugues, que son les siguientes:

• ¿Con cuántes d'estes empreses caltién contactu'l Ministeriu de Trabayu o'l Ministeriu d'Industria a fin d'estudiar planes de viabilidá, de reflotación o mantenimientu del emplegu?
• ¿Qué iniciatives va tomar el Gobiernu español pa detener y compensar esti nueu procesu de destrucción masiva del texíu industrial que sufre Asturies?
• ¿Qué midies piensa tomar el Gobiernu español pa la recuperación de capitales públicos invertíos n'empreses qu'agora anuncien el despíu parcial o total de la so plantía de trabayadores?
• ¿Ta diespuestu'l Gobiernu español a pautar de manera urxente col Gobiernu d'Asturies un Plan Estratéxicu de Reindustrialización d'Asturies?
• ¿Hai dalgún contautu o dalguna mesa de trabayu ente'l Gobiernu d'Asturies y l'español pa xestionar dalguna solución consensuada a esti nueu procesu de desindustrialización?

Na semeya, Mario Arbesú xunto colos diputaos vascos Pozueta, Aizpurua y Matute'l xueves en Madrid.