Eguiguren diz qu’ETA dexa les armes en Navidaes

El presidente del PSE, Jesús Eguiguren, apuntó ayeri nuna  entrevista en LaSexta que Navidades va ser la fecha na qu’ETA dexe les armes. Amás, señaló que Batasuna va poder presentase a les próximes elecciones autonómiques.

El parlamentariu vascu confesó qu’en Navidaes va haber un nuevu movimientu d’ETA nel qu’abandone les armes. Sicasí, sorrayó qu’ETA nun va llegar a disolvese, porque les organizaciones armaes casi nunca lo faen, exemplificando’l casu del IRA.

Eguiguren añade amás que si ETA verifica’l fin de la so actividá ante testigos y verificadores internacionales, Batasuna va llegalizase y va poder tar nes elecciones. Anque, nesta llínia, opina que ye complicáu que tea nes municipales de 2011, pero que sí que van tar nes parlamentaries de la Comunidá Autónoma Vasca.

Crítiques del PSOE y PP
El bipartidismu criticó les declaraciones del presidente del PSE. Nes files del PSOE, el Secretariu d’Organización, Marcelino Iglesias, dixo que nun compartía la visión d’Eguiguren y que’l so partíu nun tien “nenguna prisa”, sorrayando que’l Gobiernu va caltener les mismes polítiques en rellación al conflictu vascu.

Del otru llau, la secretaria xeneral del PP, María Dolores de Cospedal, dixo que'l so partíu espera una "desautorización" espresa per parte de Zapatero sobre les afirmaciones de Jesús Eguiguren, que consideró "absolutamente bochornoses". Amás, criticó al Executivu por entender que "impera" la "confusión" nes declaraciones que ta faciendo en rellación con esti asuntu y alvirtió que'l so partíu "nun va tolerar la presencia de nenguna suerte de mediador o mediadores internacionales".