Edward Said y Daniel Barenboim, premiu Príncipe d'Asturies

Si va unos años el Premiu Príncipe d'Asturies de la Concordia marchó pa Oriente Mediu cola concesión del galardón al desapaecíu Isaac Rabin y Yasser Arafat, esti añu el xuráu quixo dar otru emburrión simbólicu al procesu de paz n'aquella parte del mundu al premiar a un árabe y un israelín que trabayen pol entendimientu ente dos pueblos engarraos nun conflictu que nun tien traza d'iguase. Edward Said ye un escritor palestín qu'enseña lliteratura inglesa y estadounidense na Universidad de Columbia, dende onde dirixe'l movimientu palestín nos EUA. La so obra más conocía y importante ta dedicada al estudiu del discursu políticu y lliterariu que, dende'l sieglu XIX vien lexitimando l'apropiación occidental del Oriente, una xustificación que tien estudiada en numberosísimes obres lliteraries d'autores que tomen a la India o al mundu árabe como tema o escenariu. Les sos obres Orientalismu y Cultura y imperialismu (finalista del Premiu Anagrama nel 99) son quiciás los llibros más importantes d'esti autor, anque quen tenga especial aquello puede consultar esta web onde van poniéndose tolos artículos qu'apaecen de Said (traducciones incluyíes)El premiu compártelu col el pianista y director d'orquesta israelín d'orixe arxentinu Daniel Barenboim (Bonos Aires, 1942). Barenboim aprovecha siempres que puede la so posición como personaxe públicu pa facer declaraciones y xestos al favor del entendimientu ente los dos países y contra'l conservadurismu de la cultura oficial d'Israel, como cuando l'añu pasáu los sectores más zarraos-y montaron un espolín cuando quixo tocar en Jerusalen música de Wagner, el compositor favoritu de Hitler y nel que Barenboim ye un especialista. Más gordo foi cuando l'exércitu d'Israel-y prohibió dar un conciertu en Ramallah porque dicíen que nun podíen garantizar la so seguridá.Ente los dos premiaos caltienen dende va cuatro años un proyectu nomáu West-Eastern-Divan, que nun ye otro qu'una orquesta na que s'axunten músicos de procedencia árabe y xudía.