Educación yá trabaya na incorporación de la especialidá d’Asturianada nos conservatorios

|
Tonada Concursu Canción Asturiana Valle del Narcea

Les direiciones de los conservatorios profesionales de música d’Uviéu y Xixón, especialistes y la Conseyería d’Educación y Cultura yá trabayen nel desarrollu de la especialidá d’Asturianada como enseñanza profesional y reglada. El Gobiernu estatal aprobó’l mes pasáu la so creación a pidimientu del Executivu asturianu.

Esta decisión permite que la canción asturiana aporte a los conservatorios, como fixo años atrás la gaita, que cuenta dende esti cursu con un grau superior baxo’l nome de ‘Instrumentos de la Música Tradicional y Popular d’Asturies’. Al igual qu’asocedió con estos estudios, l’Asturianada comenzará con un enseñu elemental, pa darréu dar pasu al profesional y, depués, al superior, según vayan superando los cursos les primeres alumnes y alumnos.

La intención del Gobiernu ye espublizar  nun periodu curtiu de tiempu nel Portal de Tresparencia, tres finar los trabayos de desarrollu de la especialidá, el proyeutu de decretu en trámite de consulta pública. Cola puesta en marcha de dicha especialidá, l’Asturianada, bien de interés cultural de caráuter inmaterial “pol so raigañu tradicional, el so interés etnográficu, la complexidá del so repertoriu, el so valir histórico na cultura musical europea y el so pesu nel panoramu musical de la comunidá”, va atopar “l’espaciu necesariu pa la enseñanza, l’estudiu, la investigación, la proteición y, en consecuencia, la preservación y difusión del cantu autóctonu asturianu por escelencia”.

Estos estudios tamién van permitir la formación “a xeneraciones presentes y futures na so práutica, la so estética y los valores tradicionales”, garantizando la cualificación a los futuros profesionales na disciplina.

Na semeya, un momentu de la quinta y cabera semifinal del III Concursu de Canción Asturiana Valle del Narcea, que va vivir les sos finales nel Teatru Toreno de Cangas los díes 6 y 27, y 4 de mayu.

Contador Estadistiques