Educación y Cultura entamen un alcuentru virtual de maestros y alumnos p’amosar cómo ye l’enseñu del asturianu na escuela

|
Alba Hernández maestra Infantil xuegu alcuentru virtual

De Bachilleratu a Infantil, dellos maestros participaron xunto colos sos alumnos nel ‘Alcuentru virtual: la escuela n’asturianu’. Esta esperiencia entamada poles conseyeríes d’Educación y Cultura, Política Llingüística y Turismu buscaba “visibilizar cómo se trabaya nes aules d’Asturies l’enseñu de la Llingua Asturiana en caúna de les etapes educatives”.

El periodista Damián Barreiro encargóse de moderar esta actividá nel que tomaron parte la conseyera d’Educación, Carmen Suárez Suárez, y los maestros Claudia Gutiérrez Lueje (Bachilleratu), Paz García Álvarez (Secundaria), Víctor Suárez (Primaria) y Alba Hernández (Infantil). Un eventu virtual que se desendolcó coincidiendo col arranque del tercer trimestre, “nun momentu clave pa la matriculación pa l’asignatura” de cara al cursu viniente.

“L’oxetivu ye que tanto les families como l’alumnáu conozan el mou nel que se ta trabayando nes aules y que sían los y les estudiantes les que cuenten en primer persona la so esperiencia”, añadió Barreiro. Una ferramienta, esti alcuentu virtual, que va tener continuidá según confirmó Suárez al final del eventu.

La primera en participar foi García Álvarez, profesora de Secundaria del IES Bernaldo de Quirós, de Mieres, que tuvo acompañada pola so clase de segundu cursu. Na so intervención apuntó qu’afronta les clases “con amor y compromisu; compromisu col asturianu y col alumnáu, y colo que toi faciendo”.

Recordó la so situación d’interina, mayoritaria ente’l profesoráu de Llingua Asturiana y de Gallego-asturiano, y les consecuencies que tien pa desendolcar el so trabayu. Tamién de la materia, que “na ESO ye optativa. Escoyela pal alumnáu ye renunciar al estudiu d’una llingua estranxera, o d’asignatures más atractives como Audiovisuales o TIC”.

“El currículum d’asturianu tien cinco bloques de conteníos, ún más que’l castellán. Yo camientu que foi pensáu pa cuatro hores selmanes, por si había oficialidá, pero la verdá ye qu’hai dos; y en terceru, bono, trés”, esplicó de manera irónica. Sobre l’alumnáu apuntó la problemática de contar na aula con “munchos niveles de competencia llingüística, dende’l que nun sabe nada porque nun tien por qué y pue apuntase en primeru de la ESO, al que lleva tola Primaria estudiando asturianu”, lo qu’obliga a “metodoloxíes variaes y actividaes con estremaos graos de dificultá”.

Sobre la escolarización en Primaria, rescampló que “veo un bon trabayu nos últimos años y que vienen con munchu nivel”. Como exemplu de lo que se trabaya en clase, dellos alumnos de segundu fixeron exercicios de comprensión y espresión oral imitando al B2 d’asturianu de les pruebes de certificación de Llingua Asturiana adaptaes al Marcu Común Européu de Referencia pa les Llingües.

La importancia de deprender xugando

Hernández, profesora d’Infantil, tomó la pallabra dende’l CP Vital Azal, en La Pola Ḷḷena, onde “nun hai la oportunidá de que la maestra d’asturianu pueda entrar n’Infantil”. Sicasí, “yo puedo aprovechar dalgún ratín, dientro del área 3, pa poder meter conceptos d’asturianu. Ye una bona oportunidá la edá de 3 años pa deprender tolos idiomes, como ye l’inglés o l’asturianu, porque en realidá neses edaes somos como esponxes y presta-yos munchos deprender cualquier asignatura”.

“Xugando deprenmos un montón de coses ensin danos cuenta”, apuntó poniendo como exemplu un xuegu pa trabayar colores, orientación espacial y psicomotricidá nel que participaron escolines y escolinos de 3 años del Vital Aza. “Ye una pena que nun podamos tener la oportunidá de polo menos una sesión d’asturianu n’Infantil, pero intentamos compensalo de la meyor manera posible”, finó.

Dende’l CP Martimporra, con práuticamente un 100 por cien de matrícula na materia y colos alumnos dende los 3 años deprendiendo l’idioma, Suárez y los escolinos de terceru de Primaria participaron nun ‘kahoot’ –plataforma que permite la ellaboración de cuestionarios– d’entrugues sobre’l conceyu de Bimenes. El maestru esplicó les complicaciones de “esti cursu tan difícil y atípicu” que condicionó l’enseñu y “les habituales torgues que tien el profesoráu d’asturianu: fáltennos recursos dixitales, los qu’hai tán desactualizaos o nun son atractivos pal alumnáu, y n’otros munchos casos tamién nos falten medios”.

Enantes d’esplicar la so metodoloxía de trabayu y actividaes, rescampló les carauterístiques de la escuela onde pon clase, onde hai contautu col asturianu dende Infantil, lo que permite que los escolinos acaben la etapa de Primaria “con un conocimientu bien altu de lo que ye la llingua”.

En Bachilleratu, namái 1 hora

Gutiérrez Lueje, del IES Avelina Cerra, tien que trabayar coles circunstacies de la materia nesta etapa educativa, optativa y con una hora selmanal de clase. “Los mios oxetivos son que l’alumnáu de Bachiller salga hacia la universidá, el trabayu o la FP con un interés pola llingua asturiana y pola nuesa cultura, y con unes ferramientes pa ser quién a averase más a ella. Como tenemos sólo una horina hai que ser realistes y nun podemos pidir grandes conteníos”, asegura.

“La metodoloxía ye siempre la mesma. Primero doi unes clases de gramática, fonética y ortografía, que yo llamo de sobrevivencia, que son lo xusto p’alfabetizase n’asturianu, y les demás clases son de producción” de testos tanto orales como escritos, lo que se repite en cada trimestre. Tres poner dellos exemplos, una alumna, Laura, esplicó l’actividá que tán desendolcando xunto con compañeros de cuartu de la ESO pa participar nel IV Premiu Fierro Botas a la Meyor Idea Normalizadora.

Pa finar l’alcuentru virtual, la conseyera apuntó que “me prestó muncho esta variedá d’actividaes que güei preparasteis pa dar a conocer cómo nes nueses aules va progresando la enseñanza de la llingua”. “Vamos facer más alcuentros d’esti tipu porque equí tais una pequeña representación, pero hai más centros que trabayen igual de bien que vosotros y hai que siguir difundiendo non sólo la llingua, sinón el bon facer cola llingua”, siguió Suárez, que treslladó saludos de Berta Piñán y el so equipu, “que tamién tuvo tres esto”.

Na semeya, Hernández amuesa una tarxeta del xuegu qu'entama colos sos alumnos de 3 años del Vital Aza.

Contador Estadistiques