Educación nun va entrar a regular los deberes

El conseyeru Genaro Alonso encamienta a los centros a poner "xeres equilibraes".

“Nun vamos regular los deberes, pero sí vamos aconseyar a los centros educativos na circular próxima d'empiezu de cursu que, nel ámbitu de la so autonomía pedagóxica, establezan criterios que garanticen una coherencia”, apuntó Alonso. El titular d'Educación insistió en que les xeres nunca tienen de ser una oportunidá pa la desigualdá y señaló que’l so diseñu tien que s'aprovechar pa que los estudiantes desenvuelvan el so potencial. “Son especialmente importantes dos factores: la coordinación de los centros coles families y la calidá y relevancia de los deberes, qu’han ser ser apropiaos a la edá, el cursu y los conteníos que traten nes clases”, precisó.

Alonso presentó ayeri l'informe del Conseyu Escolar del Principáu d'Asturies del cursu 2013-2104, que reflexa que'l porcentaxe de consecución de los oxetivos educativos qu'afita la Xunión Europea pal 2020 asítiase nel país al rodiu del 85 por cientu. “En dellos indicadores tamos al nivel d'esixencia, como por exemplu nel abandonu educativu tempranu, con un porcentaxe nel 2014 del 13,6 por cientu frente a la media española, del 21,9 por cientu, y n'otros llogramos una llinia bien alta de consecución”, destacó.

L'asturianu, arrequexáu en Secundaria

El documentu recueye tamién que’l 62,3 por cientu d'alumnáu de Secundaria estudia n'Asturies dos llingües estranxeres, lo qu'asitia a la comunidá na tercer posición estatal, depués de Galicia y Canarias. Ello ye que’l páis atópase próximu al oxetivu européu 2020 en competencia d'idiomes, qu'establez que’l 75 por cientu del alumnáu estudie dos llingües estranxeres, y supera la media estatal, del 42 por cientu nel 2012. Nesi sen convién recordar que'l modelu asturianu arrequexa la llingua propia, obligando al alumnáu de Secundaria a escoyer ente la Llingua Asturiana o Gallego-asturiano y una segunda llingua estranxera.