Educación manda ufiertar llingua nos centros educativos

La Conseyería d'Educación del Principáu d'Asturies ta emitiendo circulares d'entamu de cursu escolar nes que se-yos recuerda a tolos centros la obligatoriedá d'ufiertar llingua asturiana, una obligación qu'afecta lo mesmo a los centros de primaria que los de secundaria y tamién a los de bachilleratu.

El sindicatu d'enseñanza SUATEA dio ayeri a conocer na so páxina web el conteníu d'estes circulares que vendríen a francer la dinámica pola que l'asturianu desapaecía nos impresos de matrícula de bien de centros de secundaria y bachileratu del país, como denunciare va poques selmanes la Xunta Pola Defensa de la Llingua, que llegó a amenazar con una segunda fuelga d'enseñanza tres de la que se vivió a primeros del cursu 2004-2005. Con too y con ello, el sindicatu d'enseñanza convida a toles persones rellacionaes cola educación a qu'aperten y faigan valer los sos derechos reclamando nos centros, en casu de ser preciso, pa que la ufierta qu'agora ye obligatoria, se faiga efectiva.

El testu de la circular de bachilleratu diz que "tolos centros docentes qu'impartan Educación Secundaria Obligatoria y Bachilleratu han incluyir na so ufierta de materies optatives pa tolos cursos de dambes etapes la materia "Llingua asturiana y Lliteratura" acordies colo que s'apauta nel artículu 10 de la llei 1/1998, de 23 de marzu, d'usu y promoción del Bable/Asturianu" señalando tamién que "En Bachilleratu, dau el calter cíclicu de la materia, l'alumnáu de segundu cursu va poder continuar la enseñanza de Llingua Asturiana si la cursare nel primer cursu". La circular que correspuende a enseñanza básica,pela so patrte, ratifica la obligatoriedá d'ufierta y apauta un mínimu de diez alumnos per grupu pa que se dea l'asignatura, una puntualización que nun apaez na circular de secundaria obligatoria y bachilleratu, anque dexa una puerta abierta a que puedan facese grupos con menos escolinos. Esta circular apauta tamién un horariu de 1 hora y 30 minutos a la selmana pa l'asignatura y diz que les enseñances de llingua habrá d'impartiles profesoráu con capacitación y con preferencia pa los mayestros que yá tengan plaza en centru.

Más información na web de SUATEA