Educación estudia caltener abiertes escueles rurales con menos de cuatro escolinos

El conseyeru d’Educación y Cultura, Genaro Alonso, señaló güei que’l Gobiernu d’Asturies estudia caltener abiertes escueles rurales con menos de cuatro alumnos, siempre que se cunte con una medría de la matrícula pal otru cursu.

Alonso recordó que’l Principáu punxo la ratio más baxa d’España (cuatro alumnos) pa caltener abiertes escueles rurales y amestó qu’inclusive se podríen caltener estos centros con trés estudiantes, analizando cada casu concretu y los posibles futuros usuarios. “Vamos aplicar los criterios con flexibilidá y compromisu y caltendríense escueles con menos alumnos si tenemos la garantía de qu’otros estudiantes van entrar nel sistema”, añedió.

Otra manera, el titular d’Educación señaló qu’entá nun se tomó un determín definitivu sobre’l posible zarru de la escuela de Mieldes. “La primer opción ye conocer el númberu d’alumnos que va tener el centru’l cursu viniente y inclusive l’otru, porque tenemos que cuntar con datos seguros pa tomar decisiones”, precisó.

Alonso fixo estes declaraciones en Cangas, onde visitó dellos centros educativos xunto al alcalde del conceyu, José Víctor Rodríguez.