Educación convoca les beques pa los alumnos de másteres y Erasmus+

|

La Conseyería d'Eduación y Cultura anunció qu'esta selmana van convocar les beques los alumnos de másteres universitarios y del Programa Eramus+. Tamién va facer públicu'l llistáu de persones que van beneficiase d'ayudes pa estancies formatives en Canadá.

Les beques a les que van poder optar alumnos de másteres de les universidaes d'Uviéu y d'Educación a Distancia (UNED) que cumplan los requisitos xuben a 2.000 euros por persona pa los matriculaos a tiempu completu. La cuantía total de la convocatoria algama los 100.200 euros. El cursu pasáu 54 alumnos beneficiáronse d'esta beca y, yá que la cuantía de la convocatoria se cantién nel 2016, prevése un númberu similar de beneficiarios anguaño.

Polo que se refier a les ayudes pa los estudiantes del Programa Erasmus+, convóquense cola mira d'incrementar la financiación de les estancies nel estranxeru de los beneficiarios d'esti proyeutu y suponen 200 euros adicionales por cada mes de movilidá. La cuantía total de la convocatoria xube a 215.000 euros, beneficiándose 158 alumnos esti cursu pasáu, númberu asemeyáu al que s'espera anguaño.

El plazu de presentación de les solicitúes va tar abiertu en dambos casos hasta'l 10 de setiembre próximu.

Cursu intensivu d'inglés

La Direición Xeneral d'Universidaes va espublizar tamién esta selmana la rellación d'alumnos beneficiarios de les ayudes pa la financiación parcial d'un cursu de llingua inglesa nel estranxeru. Esta midida dexa que 122 estudiantes asturianos complementen la so formación, mientres cuatro selmanes, nun curs intensivu en Canadá. Los beneficiarios abonen ente 600 y 1.600 euros, según el casu, y l'Alministración aporta'l restu hasta completar el costu total.

Contador Estadistiques