Educación anuncia que van doblase'l númberu de centros con secciones billingües d'inglés y francés

El Conseyeru d'Educación y Ciencia, José Luis Iglesias
Riopedre, aconceyó ayer coles comisiones de directores
d'Educación Primaria y Educación Secundaria. Ente les anuncies
del Conseyeru a los directores rescampla qu'ente 2007 y 2008 "van
doblase'l númberu de secciones billingües", onde s'imparten
materies diferentes a la llingua estranxera n'inglés o francés.
En concreto, en Primaria va pasase de 19 a 44 centros con secciones
billingües y en Secundaria de 21 a 36.

En cuanto a les mídies que van adoptase pal nuevu cursu, Riopedre
señaló que'l Conseyu de Gobiernu aprobará en feches
prósimes el Decretu de Derechos y Deberes del Profesoráu y
l'Alumnáu que, ente otres coses, diz que "contribuirá a
reforzar l'autoridá de los profesores nes aules". Les clases van
entamar el próximu 11 de setiembre pa los alumnos d'Infantil y Primaria,
mientres que los estudiantes de'Educación Secundaria Obligatoria (ESO) y
Bachiller van incorporase a les aules el 14 de setiembre y los de FP el 1
d'ochobre.