Educación va replantegase la negativa a la convocatoria d’oposiciones pa Infantil y Primaria

Herminio Sastre, conseyeru d’Educación y Ciencia, señaló esti martes que va analizar con rigor la situación nueva creada alredor de les oposiciones pa Infantil y Primaria. Doce comunidaes autónomes van celebrales.
 
Andalucía, Aragón, Cantabria, Catalunya, Castilla y Lleón, Comunidat Valenciana, Euskadi, Extremadura, Galicia, Illes Balears, Madrid y Navarra, son los territorios que convoquen oposiciones pa esti mes de xunu –Murcia ta pensándolo–, una posición mui diferente a la d’hai una selmana, onde paecía que namái diben celebrales aquelles comunidaes con llingua propia cooficial . Ello foi lo que llevó a Asturies a refugar una convocatoria pa esti añu, alegando motivos económicos y d’escasez de places.
 
Agora, les pallabres de Sastre dexen cayer qu’Educación ta replantegándose la so postura, lo que traería la convocatoria d’unes oposiciones mui reclamaes polos sindicatos. “La situación varió y en función d’ello va tomase una decisión que pel momentu nun puedo adelantar porque tovía nun se tomó”, afirmó.