Educación va recurrir la sentencia sobre llingua asturiana na ESO

El conseyeru d'Educación y Ciencia d'Asturies, Herminio Sastre, anunció esti martes que'l Principáu tien previsto recurrir la sentencia que declara nula la norma qu'establecía un númberu mínimu d’alumnos pa l’asignatura d'asturianu na ESO.

La Sala de lo Contencioso Alministrativo del Tribunal Superior de Xusticia d'Asturies, declaraba’l llunes 18 “nulu y sin efectos por ser contrariu a Derechu", l'artículu 5.1 de la norma qu'establecía un númberu mínimu d'ocho alumnos pa formar un grupu na asignatura de Llingua Asturiana na Educación Secundaria.
  
El TSXA estimaba asina la demanda interpuesta polos servicios xurídicos de CC.OO contra la Resolución de 16 de mayu del 2008, de la Conseyería d'Educación y Ciencia, pola que s'establecía la ufierta y les condiciones pa la elección de materies optatives y materies opcionales pa la Educación Secundaria Obligatoria.
  
Sastre, que compareció ante la Comisión d'Educación y Ciencia na Xunta Xeneral, indicó que los servicios xurídicos tán evaluando la sentencia y posiblemente va recurrise. Fízolo a preguntes del diputáu del Grupu Mestu, Roberto Colunga, que quiso saber sobre l'aplicación inmediata de la sentencia.
 
“Espilfarru de los recursos”
El conseyeru indicó que nun-y presta la sentencia y preocúpa-y "quién la planteó porque tendría que buscar la meyora del sistema educativu". "Trátase de situaciones que personalmente creo que puen implicar d'alguna forma un espilfarru de los recursos públicos", dixo Sastre, qu'añadió que "evidentemente si la sentencia se fai definitiva va cumplise".
  
Nesti sen, indicó que visto asina "pue llegar el casu de qu'una sentencia contemple que se ponga un profesor por cada alumnu y nun podrá cumplise". "Yo nun soi xurista y poro nun lo digo dende esi aspectu. Tenemos una planificación y dende'l puntu de vista personal y de recursos considero que ye bueno qu'haya un númberu llimitáu d'alumnos. Evidentemente si hai una sentencia definitiva va haber que cumplila, pero nun hai qu'olvidar que los recursos públicos son llendaos", acabó Sastre.
  
Réplica d’IX
Nesti sen, la diputada d'IX Verdes, Emilia Vázquez, comparó esa situación colos centros onde un solu alumnu recibe clases de relixón, y preguntó si la conseyería tien previsto facer algo al respecto. 
  
"La mesma respuesta que doi pal asturianu valme pa toles materies", dixo Sastre.